საქართველო, 14 ივლისი, საქინფორმი. საქართველოში აშშ-ის ელჩი, კელი დეგნანი „პრაიდის ფესტივალთან“ დაკავშირებით განვითარებულ მოვლენებს ეხმაურება.

დეგნანის თქმით, 8 ივლისს მომხდარი ფაქტი ძალიან სამწუხაროა. ელჩის განმარტებით, შაბათის ღონისძიების წინა დღეს დაარწმუნეს, რომ შსს-ს მაღალჩინოსნები ფესტივალის მოწინააღმდეგეებს პოლიციის კორდონის გარღვევის უფლებას არ მისცემდნენ, თუმცა ამ ადამიანებს არა მხოლოდ პოლიციის პერიმეტრი გარღვევის, არამედ ადგილზე შესვლისა და ვანდალიზმის უფლება მიეცათ.

„მინდა, გამოვეხმაურო გასულ შაბათს, ლისის ტბაზე განვითარებულ მოვლენებს. ძალიან სამწუხარო იყო ისეთი ადამიანების ნახვა, რომლებიც სავსე ივნენ სიძულვილით, ძალადობის გამოყენება მშვიდობიანი, დახურული კონცერტის ჩასაშლელად, განსაკუთრებით მაშინ, როდესაც ამბობენ, რომ მოქმედებენ ღმერთის სახელით. ხალხი შეიძლება, ვერ თანხმდებოდეს ბევრ საკითხზე, მაგრამ შეგვიძლია, შევთანხმდეთ, რომ ქრისიტიანული ღირებულებები, უპირველეს ყოვლისა, არის თანაგრძნობა, სიყვარული, შემწყნარებლობა, პატივისცემა, იდეა, რომ ყველა ადამიანი ღვთის ხატად არის შექმნილი.

გასულ წელს ვნახეთ, რომ პოლიციამ იცის, როგორ დაიცვას მოქალაქეები და გააკონტროლოს მომიტინგეები. წინა კვირას, შაბათის ღონისძიების წინა დღეს დამარწმუნეს, რომ შსს-ს მაღალჩინოსნები მომიტინგეებს პოლიციის კორდონის გარღვევის უფლებას არ მისცემდნენ და მომიტინგეები უსაფრთხო დისტანციას დაიცავდნენ კონცერტზე დამსწრე ხალხისგან, არცერთი არ მომხდარა. ჩვენ ასეთი ვერაფერი ვნახეთ. ფაქტობრივად, დაუმორჩილებელ ბრბოს ძალადობის მოწოდებით თბილისის ქუჩებში რამდენიმე კილომეტრის გავლის საშუალება მიეცა. მათ მიეცათ არა მხოლოდ პოლიციის პერიმეტრის გარღვევის, არამედ ადგილზე შესვლისა და პოლიციის მხრიდან უპასუხოდ ვანდალიზმის, ძარცვისა და ქონების განადგურების უფლება.

ძალიან შემაშფოთებელია იმის დანახვა, თუ რა არის თბილისის ქუჩებში მოქალაქეებზე თავდასხმების, ერთი შეხედვით, კოორდინირებული სერია. ეს ექსტრემისტები, რომლებიც შაბათს ვნახეთ, იყვნენ იგივე ექსტრემისტები, რომლებმაც მოაწყვეს ძალადობა 2021 წელს. ისინი არიან „ფეისბუქის“ საიტებზე, ვიდეოზე, მხარს უჭერენ, ძალადობისკენ მოუწოდებენ, ამბობენ, რომ თბილისის ქუჩებში სეირნობისას ყბების დამტვრევას და სისხლის დაღვრას აპირებენ, ემუქრებიან ხალხს ძალადობით და ამაყად ამბობენ, რომ ისინი ძალადობის მომხრე არიან. ვფიქრობ, თბილისში ყველა თავს უფრო დაცულად იგრძნობს, როცა ვიდეოზე ასახულ ადამიანებს დააპატიმრებენ და დასჯიან“, – განაცხადა კელი დეგნანმა.