საქართველო, 16 ივნისი, საქინფორმი. ბელგიაში კულტურის საერთაშორისო ფესტივალის, „ევროპალიისა“ და საქართველოს დამოუკიდებლობის დღისადმი მიძღვნილი საზეიმო მიღება გაიმართა.

საზეიმო მიღებაზე შეკრებილ საზოგადოებას სიტყვით მიმართა საქართველოს პრემიერ-მინისტრმა, ირაკლი ღარიბაშვილმა.

საღამოზე შეკრებილ საზოგადოებას სიტყვით მიმართეს ასევე ევროკავშირში საქართველოს წარმომადგენლობის ხელმძღვანელმა, ბელგიის სამეფოსა და ლუქსემბურგის დიდ საჰერცოგოში საქართველოს ელჩმა, ვახტანგ მახარობლიშვილმა, ბელგიის სამეფოს საგარეო საქმეთა, ევროპის საქმეთა და საგარეო ვაჭრობის, ფედერალური კულტურული ინსტიტუტების მინისტრმა, აჯა ლაბიბიდამ და ევროპული სამეზობლო პოლიტიკისა და გაფართოების საკითხებში ევროკომისარმა, ოლივერ ვარჰეიმ.

საქართველო სტუმარი ქვეყნის სტატუსით წელს პირველად მონაწილეობს კულტურის საერთაშორისო ფესტივალში „ევროპალია“.

საქართველოს მთავრობის მიერ გავრცელებული ინფორმაციით, „ევროპალია“ 2023 წლის ოქტომბრიდან 2024 წლის თებერვლამდე გაგრძელდება და ღონისძიებები ბელგიასა და ევროპის სხვადასხვა ქვეყანაში ჩატარდება. ოთხი თვის განმავლობაში წარმოდგენილი იქნება საქართველოს კულტურა. ფესტივალის სტუმრებს საშუალება ექნებათ, საქართველოს კულტურული მრავალფეროვნება გაიცნონ როგორც ტრადიციული, ისე თანამედროვე ხელოვნების საშუალებით.

ოფიციალური ინფორმაციის თანახმად, ფესტივალი ორ გამოფენას უმასპინძლებს, სახელწოდებით „საქართველო – შეხვედრების ადგილი“ და „მოდერნიზმი საქართველოში – ფანტასტიკური ავანგარდი“. ფესტივალზე თანამედროვე ვიზუალური ხელოვნება წარმოდგენილი იქნება მსოფლიოში აღიარებული ქართველი არტისტების მონაწილეობით.

სამუზეუმო გამოფენების გარდა, თანამედროვე ვიზუალურ ხელოვნებას წარმოადგენენ მსოფლიოში აღიარებული ქართველი არტისტების საავტორო გამოფენებზეც.

„საგანგებოდ აღსანიშნავია ქართული მუსიკალური ხელოვნების წარმოსაჩენად დაგეგმილი ტრადიციული, პროფესიული და თანამედროვე მუსიკის კონცერტები, ფოლკლორული ანსამბლები და ასევე „კამერული გუნდი“. გარდა ტრადიციული მუსიკისა, ევროპის საზოგადოება გაეცნობა ქართულ პროფესიულ მუსიკალურ საკომპოზიტორო ხელოვნებასაც. ფესტივალი უმასპინძლებს სასიქადულო ქართველ მუსიკოს-შემსრულებლებს. ასევე, წარმოდგენილი იქნება გერმანიაში მოღვაწე მწერლის შემოქმედება. თეატრალურ და საშემსრულებლო ხელოვნებას წარადგენენ ქართული პროფესიული თეატრები. ფესტივალზე ნაჩვენები იქნება ქართული კინო, მსოფლიო ფენომენი, რომლის მიმართაც ინტერესი იყო და დღესაც მზარდია ევროპაში“, – აღნიშნულია საქართველოს მთავრობის ინფორმაციაში.