ორი ქვეყნის ეკლესიებს შორის პრობლემურ თემებზე დღეს ერთმანეთს დახურულ კარს მიღმა სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, უწმიდესი და უნეტარესი ილია II და სრულიად სომეხთა კათოლიკოსი გარეგინ II ესაუბრნენ. შეხვედრის დასრულების შემდეგ კი ილია მეორემ საპატრიარქოში სომხეთის მთელ დელეგაციას უმასპინძლა.

როგორც ილია მეორემ ბრძანა, სადავო საკითხებთან დაკავშირებით სამეცნიერო კომისიას მოიწვევენ, რომელიც ეკლესიებისთვის იურიდიული სტატუსის მინიჭებისა და რიგი ეკლესიების დაბრუნების საკითხებზე იმსჯელებს. „ორივე მხარეს აქვს საბუთი, რომ ქართული ეკლესია არსებობს სომხეთში და სომხური ეკლესია – საქართველოში. მოვიწვევთ მეცნიერებით დაკომპლექტებულ კომისიას, რომელიც ორივე საკითხზე იმსჯელებს. მიუხედავად ორივე მხარის პრეტენზიებისა, ეს ჩვენს ძმურ ურთიერთობებს ხელს არ შეუშლის. პრობლემები არის როგორც სომხების, ისე ქართველების მხარეს. იმედია, სომხური მხარე ხელს შეგვიწყობს ეკლესიების დაბრუნების საკითხში. ჩვენი ურთიერთობა, რომელიც სამაგალითო უნდა იყოს, არა ცალმხრივ, არამედ ორმხრივ მოძრაობას ითვალისწინებს“, – ბრძანა უწმიდესმა.

დღესვე ცნობილი გახდა, რომ აღნიშნულ საკითხთან დაკავშირებით შეთანხმებას გუშინ პრეზიდენტ მიხეილ სააკაშვილთან გამართულ შეხვედრაზე მიაღწიეს. სრულიად სომეხთა პატრიარქმა გარეგინ მეორემ ბრძანა, რომ თბილისში გამართულმა შეხვედრებმა მას „დიდი ოპტიმიზმი ჩაუსახა“.