საზოგადოება
ბენ ჰოჯესი: დროა, საქართველომ გადაწყვიტოს სურს ამერიკელებთან და ევროპელებთან ყოფნა?

 საქართველო, 10 აგვისტო, საქინფორმი. „დროა, საქართველომ გადაწყვიტოს რა სურს რეალურად. სურთ კი მათ ნამდვილად იყვნენ დასავლეთის ნაწილი, სადაც ახალგაზრდებს შესაძლებლობები აქვთ? სურთ კი მათ ჰქონდეთ ეკონომიკური განვითარება? სურთ ამერიკელებთან და ევროპელებთან ყოფნა? - მე არ ვარ დარწმუნებული, რომ ხელისუფლებას ეს ნამდვილად სურს“,- ამის შესახებ ამერიკის არმიის ყოფილმა მთავარსარდალმა ევროპაში, თადარიგის გენერალ-ლეიტენანტმა ბენ ჰოჯესმა „ამერიკის ხმის“ ქართული რედაქცისთვის მიცემულ ინტერვიუში განაცხადა.

როგორც ბენ ჰოჯესი განმარტავს, ქართული საზოგადოება დაპირისპირებულია.

„დროა საქართველომ გადაწყვიტოს რა სურს რეალურად. ვფიქრობ, ქართული საზოგადოება ახლა დაპირისპირებულია. სურთ კი მათ ნამდვილად იყვნენ დასავლეთის ნაწილი, სადაც ახალგაზრდებს შესაძლებლობები აქვთ? სურთ კი მათ ჰქონდეთ ეკონომიკური განვითარება? სურთ ამერიკელებთან და ევროპელებთან ყოფნა? - მე არ ვარ დარწმუნებული, რომ ხელისუფლებას ეს ნამდვილად სურს, რადგან რუსეთს ეს არ სურს“,- აღნიშნავს ჰოჯესი.

ამასთან, მან 2008 წლის რუსეთ-საქართველოს ომზეც ისაუბრა და აღნიშნა, რომ 2008 წელს დასავლეთში გულუბრყვილოდ ფიქრობდნენ, რომ რუსეთი ნაკისრ ვალდებულებებს შეასრულებდა.

„უნდა გვახსოვდეს ის ფაქტი, რომ რუსეთი ჯერ კიდევ უკანონოდ იკავებს ტერიტორიებს საქართველოში. მიუხედავად, იმისა, რომ ე.წ. სარკოზის შეთანხმებას ხელი მოაწერეს და [მათ]უნდა დაეტოვებინათ ეს ტერიტორიები. ჩვენ დასავლეთში, გულუბრყვილოდ ვფიქრობდით, რომ როდესმე რუსეთი შეასრულებდა რაიმე შეთანხმებას. დღეს თუ ვინმე კიდევ ასე ფიქრობს, შესაძლებელია შეხედოს საქართველოს, სადაც რუსეთმა ვალდებულებები არ შეასრულა. მე ვფიქრობ, რომ დღეს დასავლეთი კარგად აღიქვამს შექმნილ ვითარებას“, - აცხადებს ჰოჯესი.