საქართველო, 11 თებერვალი, საქინფორმი. პარლამენტის თავმჯდომარე შალვა პაპუაშვილი ვესტმინსტერის ფონდის დემოკრატიისთვის (Westminster Foundation for Democracy) აღმასრულებელ დირექტორს, ენტონი სმიტს შეხვდა.

პარლამენტის პრესსამსახურის ინფორმაციით, შეხვედრაზე მხარეებმა მიმოიხილეს საქართველოს პარლამენტისა და ვესტმინსტერის ფონდის ნაყოფიერი თანამშრომლობა.

მათივე ცნობით, შალვა პაპუაშვილმა ფონდის დირექტორს მადლობა გადაუხადა საქართველოში საპარლამენტო დემოკრატიის მხარდაჭერისთვის, მათ შორის პარლამენტის საზედამხედველო ფუნქციის გაძლიერებისა და მოქალაქეების საკანონმდებლო პროცესებში ჩართულობის გაუმჯობესებისთვის.

მხარეებმა, აგრეთვე, ისაუბრეს სამომავლო თანამშრომლობის პერსპექტივებზე.

შეხვედრა შალვა პაპუაშვილისა და მისი თანმხლები დელეგაციის გაერთიანებულ სამეფოში ოფიციალური ვიზიტის ფარგლებში შედგა. საპარლამენტო დელეგაციის შემადგენლობაში არიან დეპუტატები: ნიკოლოზ სამხარაძე, ნინო წილოსანი, გიორგი ხელაშვილი და თეონა აქუბარდია, ასევე, პარლამენტის თავმჯდომარის კაბინეტის უფროსი ლევან მახაშვილი.