საზოგადოება
ყვითელი ავტობუსის ლოდინში დახარჯული დრო და ფული

avtobusi---patariZeარაერთხელ დაიწერა მგზავრთა გადაყვანასა და სატრანსპორტო მომსახურებაზე, თუმცა გაუმჯობესების ნაცვლად, მდგომარეობა დღითიდღე უარესდება.

ისედაც გამოხშირულ მარშრუტებზე პიკის საათებში ყვითელი ავტობუსები კანტიკუნტად დადიან – ხალხით გადაჭედილი და მარჯვენა მხარეს საცოდავად გადახრილი. ხუთიოდე თვის წინათ თუ მგზავრი ერთი მიმართულებით 40 თეთრად მგზავრობდა, ახლა იმავე მარშრუტით რამდენიმე ავტობუსში (მათ შორის, მეტროშიც) გადაჯდომა უხდება, დანიშნულების ადგილს რომ მიაღწიოს, ცხადია, სამმაგი ფინანსური დანახარჯით (ძირითადად, მეტროთი გზის გაგრძელების შემთხვევაში მგზავრობა შეღავათიანი არ არის და ბარათიდან 50 თეთრი იჭრება).

დაგვიანებული მგზავრისთვის საღამოს მაინც შეღავათი იყო მუნიციპალური ტრანსპორტის უფასო ცხელ ხაზზე დარეკვა – ოპერატორები აწვდიდნენ ინფორმაციას ავტობუსის განრიგისა და ადგილმდებარეობის შესახებ.

აღმოჩნდა, რომ 17 მაისიდან ეს ცხელი ხაზი აღარ ფუნქციონირებს, რაც არა მხოლოდ მგზავრებს, მძღოლებსაც აფერხებს (სალაროაპარატის გაუმართაობის ან სხვა შემთხვევის გამო ისინი უფასოდ ვეღარ უკავშირდებიან ცენტრს და მხოლოდ მობილურიდან მობილურზე პირადი კავშირებით ატყობინებენ ინფორმაციას).

საქინფორმი საკითხით დაინტერესდა და მერიის ცხელი ხაზიდან რამდენიმე პუნქტს დააკავშირეს. ბოლოს, როგორც იქნა, პრესსამსახურიდან განგვიმარტეს, რომ ცხელი ხაზის ტენდერით გამოცხადებული ერთწლიანი ვადა ამოიწურა. ახლა მიდის მუშაობა და, სავარაუდოდ, მისი მომსახურება ერთ კვირაში აღდგება.