წმინდა ნიკოლოზის დღესასწაულთან დაკავშირებით, ყოვლადწმინდა სამების საკათედრო ტაძარში საღმრთო ლიტურგია აღესრულა. წირვის დასრულების შემდეგ სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა, უწმიდესმა და უნეტარესმა ილია მეორემ მრევლს ქადაგებით მიმართა. კათოლიკოს-პატრიარქი ქადაგებისას მოკლედ შეეხო ქვეყანაში შექმნილ პოლიტიკურ სიტუაციას და აღნიშნა, რომ ადამიანებს შორის დაძაბული პოლიტიკური ურთიერთობებია.

„მინდა წმიდა ილია მართლის სიტყვები გავიხსენო, რომ უპირველესია ენა, მამული, სარწმუნოება და დავამატო „ღმერთი, სამშობლო, ადამიანი“. ადამიანს უნდა გავუფრთხილდეთ, არ უნდა ვაკადროთ ისეთი სიტყვა, რომლისაც მერე შეგვრცხვება. ცუდი ისევ ადამიანს მოუბრუნდება“, – ბრძანა ქადაგებისას უწმიდესმა.

ამასთან, ილია მეორემ ზნეობრივი სიწმინდის აუცილებლობაზე, წეს-ჩვეულებების შენარჩუნებაზე იქადაგა, რადგან, მისი თქმით, ბოლო პერიოდში საზოგადოებაში დიდი ნიაღვარით მოდის უზნეობა. კათოლიკოს-პატრიარქმა ბრძანა, რომ თითოეული ოჯახი უნდა იყოს მთლიანი ერთი პატარა ეკლესია.