სამართალი
სამეგრელო-ზემო სვანეთისა და აჭარის პოლიციის დეპარტამენტებს ახალი დირექტორები ჰყავთ

 საქართველო, 12 თებერვალი, საქინფორმი. შინაგან საქმეთა სამინისტროს 11 თებერვლის ინფორმაციით, სამეგრელო-ზემო სვანეთისა და აჭარის პოლიციის დეპარტამენტებს ახალი ხელმძღვანელები ჰყავთ.

შს მინისტრის, ვახტანგ გომელაურის გადაწყვეტილებით, სამეგრელო-ზემო სვანეთში ამ თანამდებობაზე ნიკოლოზ დიასამიძე დაინიშნა. იგი, ამ დრომდე შსს-ს ცენტრალური კრიმინალური პოლიციის დეპარტამენტის დირექტორის მოადგილე იყო.

დიასამიძემ პოსტზე ავთანდილ გალდავა შეცვალა, რომელიც ამავე თანამდებობაზე აჭარაში გადაინაცვლებს. თავის მხრივ, გალდავამ პოსტზე კონსტანტინე ანანიაშვილი ჩაანაცვლა, რომელიც პრემიერ-მინისტრმა გიორგი გახარიამ 9 თებერვალს მთავრობის რეგიონული პოლიტიკისა და მართვის სამსახურის ხელმძღვანელად დანიშნა.

სწორედ ავთანდილ გალდავა აწარმოებდა მოლაპარაკებებს 2020 წლის 21 ოქტომბერს, ზუგდიდში „საქართველოს ბანკის“ ფილიალზე თავდამსხმელ ბადრი ესებუასთან, მოგვიანებით კი – იგი მძევლებს ჩაენაცვლა. სამთვენახევრიანი ძებნის მიუხედავად, ესებუა შსს-ს ამ დრმდე არ დაუკავებია.

დაახლოებით ორი კვირის წინ, გომელაურმა პოლიციის დეპარტამენტების ახალი ხელმძღვანელები დანიშნა კახეთში, გურიასა და სამცხე-ჯავახეთშიც.