საზოგადოება
„საგზაო ნიშნები და მოძრაობის უსაფრთხოება“ სკოლებში

martvis-motsmobaროგორც საქართველოს შს და განათლებისა და მეცნიერების მინისტრებმა დღეს მთავრობის სხდომის დაწყებამდე გამართულ პრესკონფერენციაზე განაცხადეს, 2011-2012 სასწავლო წლიდან ზოგადსაგანმანათლებლო დაწესებულებებში ახალი საგნის – „საგზაო ნიშნები და მოძრაობის უსაფრთხოება“ – სწავლების დაწყებაა ნავარაუდები. საკითხი მთავრობის დღევანდელ სხდომაზე განიხილება, ხოლო შემდეგ დიმიტრი შაშკინი და ვანო მერაბიშვილი ერთობლივ პრესკონფერენციას ჩაატარებენ.

განათლებისა და მეცნიერების მინისტრ დიმიტრი შაშკინის განცხადებით, „ერთიან ეროვნულ სასწავლო გეგმაში ცვლილება შედის, რომლის თანახმადაც, საჯარო სკოლებში მეთერთმეტე კლასის მოწაფეები ახალ სავალდებულო საგანს – „საგზაო ნიშნები და მოძრაობის უსაფრთხოება“ – გაივლიან“. ამისათვის პედაგოგთა კადრი პოლიციის აკადემიაში სპეციალურად გადამზადდება, სახელმძღვანელოები კი ზაფხულში დამზადდება. ახალი სასწავლო წლიდან საგანი ერთი წლის განმავლობაში სავალდებულო გახდება ყველა საჯარო სკოლისთვის და იმ მოსწავლეს, რომელსაც ამ საგანში ჩათვლა ექნება,

„უფლება მიეცემა, მართვის მოწმობა 18 წლამდე აიღოს“, – განაცხადა დიმიტრი შაშკინმა.

შს მინისტრმა ვანო მერაბიშვილმა ინიციატივის ბევრ დეტალზე ისაუბრა, მათ შორის, „ვინც მართვის მოწმობას 17 წლის ასაკში აიღებს, 18 წლის რომ გახდება, დარღვევების არარსებობის შემთხვევაში, ახალ, საერთაშორისოდ აღიარებულ მოწმობას მიიღებს... 
მართვის მოწმობის აღების გამოცდაზე ერთ-ერთი მშობლის დასწრება სავალდებულოა და თუ ამას მშობლები ვერ ახერხებენ, მოსწავლემ მშობლის თანხმობა წერილობითი ფორმით უნდა წარადგინოს. მასში დაფიქსირდება, რომ მშობელი საკუთარ შვილს მანქანის ტარების უფლებას აძლევს. აღსანიშნავია, რომ მსგავსი პრაქტიკა გერმანიისა და აშშ-ის ქალაქების 1/3-ში უკვე მოქმედებს, თუმცა სხვაგან რომც არ იყოს, ამ პრაქტიკის დანერგვა ჩვენი მხრიდან კარგია, რადგან რეგიონში ჩვენი პირველობა უკვე  მოდურ ტენდენციად იქცა... გამოცდაზე გასვლის პირველი მცდელობა უფასო იქნება... 
ახალგაზრდას, რომელიც მართვის მოწმობას 17 წლის ასაკში აიღებს, მგზავრთა გადაყვანის უფლება არ ექნება“. 
ამასთან, ერთი და იგივე ტიპის დარღვევების დაგროვების შემთხვევაში მოსწავლეებს მართვის მოწმობა ერთი წლის ვადით ჩამოერთმევათ. 
შესაბამისი კანონპროექტი პარლამენტში 29 აპრილს შევა, ზაფხულის განმავლობაში დამტკიცდება, სექტემბრიდან კი ამოქმედდება.