საზოგადოება
ქიბარ ხალვაში ირაკლი ოქრუაშვილის წინააღმდეგ გამოძიების დაწყებას ითხოვს

 საქართველო, 23 ივლისი, საქინფორმი. „რუსთავი 2“-ის მფლობელის, ქიბარ ხალვაშის ადვოკატმა, ნინო ბარაჩაშვილმა ირაკლი ოქრუაშვილის წინააღმდეგ გენერალურ პროკურატურას მიმართა.

ადვოკატმა უწყებაში შესაბამისი განცხადება გუშინ შეიტანა, რომლითაც ოქრუაშვილის წინააღმდეგ გამოძიების დაწყებას ითხოვს.

„მოგახსენებთ, რომ დღეს განცხადებით მივმართეთ გენერალურ პროკურატურას გამოძიების დაწყების მოთხოვნით, ვინაიდან ირაკლი ოქრუაშვილის მხრიდან ყალბი დოკუმენტების გამოყენებით ადგილი აქვს ქონებრივი უფლების მიღების მცდელობას. ხელმოწერების ნამდვილობასთან დაკავშირებით სამხარაულის ექსპერტიზის ბიუროში დანიშნულია ექსპერტიზა, შესაბამისად, დაველოდოთ ექსპერტიზის პასუხებს, გამოძიების პასუხებს“, – განაცხადა ბარაჩაშვილმა.

ირაკლი ოქრუაშვილის მტკიცებით, მასსა და ქიბარ ხალვაშს შორის ბერლინში, 2010 წელს გაფორმდა შეთანხმება, რომლის მიხედვითაც, ხალვაში „რუსთავი 2“-ის მხოლოდ ფორმალური მმართველი უნდა ყოფილიყო და შეთანხმებაზე ხელმოწერა, ექპერტიზის სამი დასკვნითაა დადასტურებული.

ქიბარ ხალვაშის ადვოკატები ამტკიცებენ, რომ დოკუმენტები, რაზეც ირაკლი ოქრუაშვილი და მისი ინტერესების დამცველები საუბრობენ, გაყალბებულია.