საქართველო, 21 ივნისი, საქინფორმი. პარლამენტთან, სადაც გუშინ მართლმადიდებლობის პარლამენტთაშორისი ასამბლეის 26-ე გენერალურ სესიასთან დაკავშირებით დაპირისპირება მოხდა, აქტივისტები პუტინის ფოტოებით მივიდნენ და ფოტოებს ცეცხლი წაუკიდეს. ამ ფორმით აქტივისტებმა მართლმადიდებლობის პარლამენტთაშორისი ასამბლეის 26-ე სესიაში რუსი დეპუტატების, მათ შორის ასამბლეის პრეზიდენტის, რუსეთის დუმის დეპუტატის სერგეი გავრილოვის მონაწილეობა გააპროტესტეს.

თბილისში მართლმადიდებლობის პარლამენტთაშორისი ასამბლეის 26-ე გენერალური სესია მიმდინარეობდა, სესია, რომელიც ოთხშაბათს სახელმწიფო ცერემონიების სასახლეში გაიხსნა, მეორე დღეს პარლამენტის პლენარულ სხდომათა დარბაზში გაგრძელდა. პარლამენტის სპიკერისთვის განკუთვნილი ადგილიდან დელეგატებს ასამბლეის პრეზიდენტმა, რუსეთის დუმის დეპუტატმა, კომუნისტური პარტიის წევრმა სერგეი გავრილოვმა მიმართა, რომელიც სხდომას უძღვებოდა. აღნიშნული ფაქტი „ევროპული საქართველოს“ წევრებმა გააპროტესტეს. ისინი შესვენების დროს სხდომათა დარბაზში პლაკატებითა და შეძახილებით შევიდნენ, მოგვიანებით მათ „ნაციონალური მოძრაობის“ წევრებიც შეუერთდნენ. დარბაზში დაპირისპირება და ხმაური იყო.

ფრაქცია „ქართული ოცნების“ თავმჯდომარემ მამუკა მდინარაძემ განაცხადა, რომ სერგეი გავრილოვი შეუთანხმებლად აღმოჩნდა პარლამენტის თავმჯდომარის სავარძელში. მისი თქმით, ასამბლეის სხდომა საქართველოს პარლამენტში ვეღარ გაგრძელდება.

სხდომა საქართველოს პარლამენტში შეწყდა და სესიის დელეგატებმა პარლამენტი დატოვეს.