აქტუალური
რუსული გავლენა საქართველოში მცირდება და ეს ჩვენი ხელისუფლების ერთ-ერთი დამსახურებაა - ირაკლი კობახიძე
საქართველო, 10 მაისი, საქინფორმი. რუსული გავლენა საქართველოში მცირდება, ამაზე მეტყველებს არჩევნების შედეგებიც, პრორუსული პარტიები უფრო ნაკლებ ხმებს იღებენ საქართველოში, – ამის შესახებ საქართველოს პარლამენტის თავმჯდომარემ ირაკლი კობახიძემ საბჭოთა სიმბოლიკის გამოყენებისა და ე.წ. უკვდავი პოლკის მიერ გამართული აქციის თაობაზე დასმული შეკითხვის საპასუხოდ განაცხადა.
„ეს არის, რა თქმა უნდა, სამწუხარო მოვლენა ჩვენთვის. მნიშვნელოვანია, ვიზრუნოთ იმაზე, რომ რუსული გავლენა არ გაფართოვდეს. თქვენ ხედავთ, რომ გასული წლების განმავლობაში არათუ არ ფართოვდება, მცირდება რუსული გავლენა საქართველოში. ამაზე მეტყველებს არჩევნების შედეგებიც, პრორუსული პარტიები უფრო ნაკლებ ხმებს იღებენ საქართველოში. ეს არის ჩვენი ხელისუფლების ერთ-ერთი დამსახურება. აქციის მოწყობა შეუძლია ყველას, მთავარია, როგორია ამაზე ხელისუფლების რეაგირება“, – განაცხადა ირაკლი კობახიძემ.
