სამართალი
რუსულ ბაზაზე თვალებახვეული გადამიყვანეს - მაია ოთინაშვილი
საქართველო, 10 ოქტომბერი, საქინფორმი. რუსულ ბაზაზე გადაყვანის დროს თვალები ახვეული მქონდა, – ამის შესახებ რუსი სამხედროების მიერ დაკავებულმა მაია ოთინაშვილმა პირველ არხს გათავისუფლების შემდეგ განუცხადა.
„რუსულ ბაზაზე ვიყავი ერთი დღე, დილიდან საღამომდე. აქედან დაკავების დროს ძალის გამოყენებით გადამიყვანეს. კარგად არ მესმოდა, რუსულად რას ლაპარაკობდნენ. მოჰქონდათ რაღაც ფურცლები და ხელს მაწერინებდნენ.
ბაზიდან ცხინვალის იზოლატორში გადამიყვანეს, ოთხი დღე იქ ვიყავი. მეხუთე დღეს სასამართლო გვქონდა. ერთთვიანი შეგვიფარდეს და მას შემდეგ ციხეში ვიყავი.
ორი სასამართლო პროცესი იყო. ერთწლიანი პირობითი მომისაჯეს. განმიმარტეს, რომ ექვსი თვე არ უნდა ჩავიდინო ეს დანაშაული, ისინი რასაც ეძახიან დანაშაულს. თუ მერე კიდევ დავიჭერთ, მერე გაგასამართლებთო. ყველაზე ძალიან ჩემი სახლი და ბავშვები მენატრებოდა“, – განაცხადა მაია ოთინაშვილმა.
ახალგორის ე.წ. რაიონულმა სასამართლომ მაია ოთინაშვილი პატიმრობიდან გაათავისუფლა. ოთინაშვილი სოფელ ხურვალეთში საკუთარ ოჯახში იმყოფება. საოკუპაციო ძალებმა ის 29 სექტემბერს დააკავეს.
