საქართველო, 1 ოქტომბერი, საქინფორმი. როგორი იქნება საქართველოს პოზიცია უკრაინის ავტოკეფალიასთან დაკავშირებით, ამ დრომდე უცნობია. საქართველოს საპატრიარქოში ოფიციალური განცხადების გაკეთებამდე კონკრეტული ნაბიჯების გადადგმას კონსტანტინოპოლისა და შემდეგ უკვე რუსეთის საპატრიარქოებიდან ელოდებიან.

პროგნოზების გაკეთება უჭირს კათოლიკოს-პატრიარქის მოსაყდრის თანაშემწეს, დეკანოზ ანდრია ჯაღმაიძეს. მისი თქმით, საქართველო ამ საკმაოდ რთულ განხილვებში არ მონაწილეობს.

„უთანხმოება ამ საკითხთან დაკავშირებით არსებობს ორ დიდ ეკლესიას შორის, თითოეულ მათგანს აქვს თავიანთი ლოგიკა. ჩვენ არ ვიღებთ მონაწილეობას ამ მსჯელობებში. უკრაინის საეკლესიო ცხოვრებაში არის ძალიან ბევრი სირთულეები და ამიტომ პროგნოზის გაკეთება ძალიან რთულია“, - განაცხადა კიკეთის ეკლესიის წინამძღვარმა, საქართველოს კათოლიკოს-პატრიარქის მოსაყდრის თანაშემწემ მამა ანდრია ჯაღმაიძემ.