მართლწესრიგის ოფიცრის 365 ვაკანტური ადგილის დასაკავებლად შსს-ში 3400-ზე მეტი განაცხადი შევიდა (ვიდეო)
სამართალი
მართლწესრიგის ოფიცრის 365 ვაკანტური ადგილის დასაკავებლად შსს-ში 3400-ზე მეტი განაცხადი შევიდა (ვიდეო)

     საქართველო, 31 ივლისი, საქინფორმი. საქართველოს შინაგან საქმეთა სამინისტროში მართლწესრიგის ოფიცრის პოზიციაზე განაცხადების მიღება დასრულდა. უწყებამ იმ მსურველებს, რომლებმაც ვაკანტური თანამდებობის დასაკავებლად კონკურსში მონაწილეობის მიზნით რეგისტრაცია სხვადასხვა მიზეზით ვერ მოახერხეს, შანსი მისცა, აღნიშნული პროცედურა სამინისტროს თანამშრომლების დახმარებით გაევლოთ (ვიდეო იხ. აქ).

შინაგან საქმეთა სამინისტროს ინფორმაციით, ამ მომსახურებით შსს-ს ერთიანი მომსახურების ცენტრში 100-მდე კონკურსანტმა ისარგებლა და უმოკლეს დროში რეგისტრაცია წარმატებით დაასრულა.

უწყების ცნობით, შინაგან საქმეთა სამინისტროში მართლწესრიგის ოფიცრის 365 ვაკანტური ადგილის დასაკავებლად ჯამში 3400-ზე მეტი განაცხადი დაფიქსირდა. შესაფერისი კანდიდატების შესარჩევად მომდევნო ეტაპი განცხადების გადარჩევაა, რის შემდეგაც მათ უნარ- ჩვევების ტესტი / IQ ტესტირება და გასაუბრება ჩაუტარდებათ.

შერჩეული კანდიდატები მართლწესრიგის ოფიცრის სპეციალურ პროფესიულ საგანმანათლებლო პროგრამას შინაგან საქმეთა სამინისტროს აკადემიაში გაივლიან. აღსანიშნავია, რომ ახალი წესის თანახმად, აკადემიაში მათი სწავლის სამთვიანი პერიოდი ანაზღაურებადი იქნება.

მართლწესრიგის ოფიცრის კომპეტენციაში შევა ისეთი მნიშვნელოვანი საკითხები, როგორიცაა: არასრულწლოვნებთან, ოჯახში ძალადობასთან, სამეზობლო დავებთან, უკანონო მიგრაციასთან, მოწყვლად ჯგუფებთან დაკავშირებულ პრობლემებსა და გამოწვევებზე რეაგირება. მართლწესრიგის ოფიცრის ინსტიტუტი ორიენტირებული იქნება დანაშაულისა და სამართალდარღვევების თავიდან აცილების მიზნით პრევენციული ღონისძიებების განხორციელებაზე“, – აღნიშნულია საქართველოს შინაგან საქმეთა სამინისტროს ინფორმაციაში.

უწყების ცნობით, შინაგან საქმეთა სამინისტროს შიდა რესურსიდან შერჩეული 66 ოფიცერი გადამზადებას პოლიციის აკადემიაში უკვე გადის და მართლწესრიგის პირველი ოფიცრები თბილისის ქუჩებში, კონკრეტულად კი ვაკე-საბურთალოს რაიონებში სექტემბერში გამოჩნდებიან.

შსს-ში ასევე აცხადებენ, რომ მართლწესრიგის ოფიცრის ინსტიტუტის ამოქმედება რეგიონებშიც იგეგმება.