საქართველო, 25 ივლისი, საქინფორმი. ათენში საქართველოს საელჩო საქართველოს მოქალაქეებს მიმართავს და ცხელი ხაზის ნომერს +306995779793 აქვეყნებს. სწორედ ამ ნომერზე შეუძლიათ საქართველოს მოქალაქეებს ათენთან გაჩენილი ხანძრის გამო, საჭიროების შემთხვევაში, საელჩოს დაუკავშირდნენ (ვიდეოს იხ. აქ).

საელჩოს ინფორმაციით, გუშინ ღამით უწყებას საქართველოს სამი მოქალაქე დაუკავშირდა, რომელთაც შესაბამისი დახმარება გაეწიათ, მათ შორის, ერთი ხანძრის ზონიდან გამოიყვანეს.

„ათენის ზოგიერთ გარეუბანში გაჩენილი ხანძრის გამო, საქართველოს საელჩო აგრძელებს საგანგებო რეჟიმში მუშაობას. გუშინდელი ღამის განმავლობაში საელჩოს ცხელ ხაზს დაუკავშირდა საქართველოს სამი მოქალაქე, რომელთაც შესაბამისი დახმარება გაეწიათ, მათ შორის, ერთ-ერთი მათგანი გვიან ღამით, უშუალოდ საკონსულოს სამსახურის თანაშრომლების მიერ ხანძრის ზონიდან გამოყვანილი იქნა.

მოგმართავთ თხოვნით, გააგრძელეთ საქართველოს საელჩოსთან კომუნიკაცია ცხელი ხაზის მეშვეობით, ნომერზე +306995779793 და კვლავ მოგვაწოდოთ ინფორმაციები საქართველოს მოქალაქეებთან დაკავშირებულ ფაქტებზე, რაზეც საქართველოს საელჩოს როგორც ყოველთვის მყისიერი რეაგირება ექნება“, – ნათქვამია საელჩოს განცხადებაში, რომელიც სოციალურ ქსელში, უწყების ოფიციალურ გვერდზეა განთავსებული.


საბერძნეთში ხანძრის შედეგად დაღუპულთა რიცხვი 50-მდე გაიზარდა

     საბერძნეთში, ათენის სიახლოვეს, ტყეში ხანძრის შედეგად დაღუპულთა რიცხვი 50-მდე გაიზარდა, – ამის შესახებ ბერძნული მედია წერს.

მანამდე ბერძნული მედიაკომპანია ERT-მა 24 დაღუპულისა და 69 დაშავებულის შესახებ გაავრცელა ინფორმაცია. მოგვიანებით კი, ცნობილი გახდა, რომ კიდევ 26 ადამიანის ცხედარი მაშველებმა ქალაქ რაფინის სიახლოვეს აღმოაჩინეს. აღნიშნულ ინფორმაციას ქალაქის მერის მოადგილე ადასტურებს.

საბერძნეთში ბოლო რამდენიმე დღეა ჰაერის ტემპერატურა 40 გრადუსს აღწევს. გუშინ ათენის სიახლოვეს მდებარე რამდენიმე დასახლებასთან ხანძრის რამდენიმე კერა ერთდროულად გაჩნდა. ცეცხლის გავრცელებას მშრალმა ამინდმა და ქარმა შეუწყო ხელი.

საბერძნეთის ხელისუფლებამ საერთაშორისო საზოგადოებას უკვე მიმართა და ხანძართან საბრძოლველად დახმარება სთხოვა.

1tv.ge