საქართველო, 29 ივნისი, საქინფორმი. ეკონომიკისა და მდგრადი განვითარების მინისტრის მოადგილემ გენადი არველაძემ, რომელიც ჰონგ-კონგში სამუშაო ვიზიტით იმყოფება და „სარტყლისა და გზის სამიტში“ (Belt and Road Sammit) მონაწილეობს, 28 ივნისს ხელი მოაწერა თავისუფალი ვაჭრობის შეთანხმებას „ჰონგ-კონგ ჩინეთთან“.

შეთანხმების მიზანია საქართველოსა და ჩინეთის სახალხო რესპუბლიკის სპეციალურ ადმინისტრაციულ რეგიონს ჰონგ-კონგს შორის საქონლის თავისუფალი გადაადგილების პირობების განსაზღვრა და მომსახურებით ვაჭრობის ხელშეწყობა. მხარეთა შორის ახალი თაობის შეთანხმება ასევე ფარავს ისეთ თემებს, როგორიცაა საბაჟო და ვაჭრობის ხელშეწყობა, ინტელექტუალური საკუთრების უფლებები, ტექნიკური ბარიერები ვაჭრობაში, სანიტარიული და ფიტოსანიტარიული ზომები და სხვა. მომსახურების სფეროში შეთანხმების პირობების შესაბამისად, საქართველოსთვის მიმზიდველია ტურიზმის სექტორი და ასევე სატრანსპორტო მომსახურება საზღვაო ტრანსპორტით მგზავრთა გადაყვანის და ტვირთის გადაზიდვის მიმართულებით.

ვიზიტის ფარგლებში ასევე დაგეგმილია გენადი არველაძის მოხსენებით გამოსვლა „სარტყლისა და გზის სამიტზე“, აგრეთვე ორმხრივი შეხვედრა ჰონგ-კონგის კომერციისა და ეკონომიკური განვითარების მდივანთან ედვარდ იაუ თენგ-ვასთან.