ნათია მეზვრიშვილი - მავნე და არამავნე ნარკოტიკებზე და ლიბერალიზაციაზე მსჯელობა ნარკოდანაშაულს ახალისებს
საზოგადოება
ნათია მეზვრიშვილი - მავნე და არამავნე ნარკოტიკებზე და ლიბერალიზაციაზე მსჯელობა ნარკოდანაშაულს ახალისებს

     საქართველო, 9 მაისი, საქინფორმი. შინაგან საქმეთა მინისტრის მოადგილე ნათია მეზვრიშვილი აცხადებს, რომ მავნე და არამავნე ნარკოტიკებზე მსჯელობა, ისევე, როგორც დაუსრულებელი საუბრები ნარკოტიკების ლიბერალიზაციაზე, მხოლოდ ახალისებს ნარკოდანაშაულს. ამის შესახებ მეზვრიშვილმა შსს-ში გამართულ ბრიფინგზე განაცხადა.
„აქვე გვსურს, გამოვეხმაუროთ ბოლო დღეების განმავლობაში ნარკოტიკულ საშუალებებთან დაკავშირებით გამოთქმულ მოსაზრებებს, რომ თითქოს არსებობს მავნე და არამავნე ნარკოტიკები, რომ თითქოს მეფედრონი კლავს და სხვა სინთეტიკური ნარკოტიკი ან ჰეროინიარა.
ამგვარი მსჯელობა, ისევე, როგორც დაუსრულებელი საუბრები ლიბერალიზაციაზე, მხოლოდ ახალისებს ნარკოდანაშაულს, ახდენს ნარკოტიკების პროპაგანდას და ხელს უშლის პრევენციას. შინაგან საქმეთა სამინისტროს ერთ-ერთი უმთავრესი პრიორიტეტია ნარკოდანაშაულთან ბრძოლა და ეს ბრძოლა დღევანდელი გამოწვევების ფონზე კიდევ უფრო გამკაცრდება“, – განაცხადა ნათია მეზვრიშვილმა.