აშშ-ის კონგრესმენთა დელეგაცია საქართველოში განხორციელებულ რეფორმებს შთამბეჭდავად აფასებს
პოლიტიკა
აშშ-ის კონგრესმენთა დელეგაცია საქართველოში განხორციელებულ რეფორმებს შთამბეჭდავად აფასებს

     საქართველო, 7 მაისი, საქინფორმი. აშშ-ის კონგრესმენთა დელეგაცია წარმომადგენელთა პალატის იურიდიულ საკითხთა კომიტეტის თავჯდომარის ბობ გუდლატის ხელმძღვანელობით საქართველოში განხორციელებულ რეფორმებს შთამბეჭდავად აფასებს, - ამის შესახებ კონგრესმენებმა საქართველოს პრემიერ-მინისტრ გიორგი კვირიკაშვილთან შეხვედრისას განაცხადეს.
საუბრისას ხაზი გაესვა აშშ-საქართველოს ურთიერთობების განვითარების პოზიტიურ დინამიკას და აღინიშნა, რომ ამ მხრივ განსაკუთრებული იყო 2017 წელი, რომელიც მათ შორის მაღალი დონის ვიზიტებით გამოირჩეოდა.
პრემიერ-მინისტრმა განაცხადა, რომ საქართველოს მთავრობისთვის აშშ-სთან სტრატეგიული პარტნიორობის კიდევ უფრო გაღრმავება უმნიშვნელოვანესი პრიორიტეტია და 2018 წლის ბიუჯეტის კანონში საქართველოსთვის მნიშვნელოვანი პუნქტების მხარდაჭერისთვის კონგრესს მადლობა გადაუხადა.
მხარეებმა ასევე ისაუბრეს ორმხრივი სავაჭრო-ეკონომიკური ურთიერთობის განვითარებაზე, მათ შორის, შესაძლო თავისუფალი სავაჭრო შეთანხმების მნიშვნელობაზე. პრემიერმა აღნიშნა, რომ საქართველოს მთავრობა მიესალმება მსხვილი ამერიკული კომპანიების ინვესტიციას ანაკლიის ღრმაწყლოვანი პორტის პროექტის განხორციელებაში.
შეხვედრისას ყურადღება დაეთმო საქართველოში განხორციელებულ რეფორმებს. გიორგი კვირიკაშვილმა კონგრესმენებს გააცნო საქართველოს მთავრობის ოთხპუნქტიანი გეგმა, მათ შორის საგადასახადო რეფორმა და საერთაშორისო რეიტინგებში საქართველოს შთამბეჭდავი პროგრესი.
კონგრესმენებმა საქართველოს მადლობა გადაუხადეს საერთაშორისო მისიებში შეტანილი მნიშვნელოვანი წვლილისთვის და აღნიშნეს, რომ აშშ-ის კონგრესი მზად არის, მომავალშიც განაგრძოს საქართველოს მხარდაჭერა ყველა მიმართულებით, მათ შორის სავაჭრო კავშირების გაღრმავებისა და თავდაცვისა და უსაფრთხოების სფეროში.
შეხვედრაზე საუბარი შეეხო რეგიონში არსებულ ვითარებას და საქართველოს ოკუპირებულ ტერიტორიებზე განვითარებულ მოვლენებს. საქართველოს პრემიერ-მინისტრმა ამერიკელ კონგრესმენებს ქვეყნის ტერიტორიული მთლიანობისა და სუვერენიტეტის მტკიცე მხარდაჭერისთვის მადლობა გადაუხადა.