პოლიტიკა
საქართველო ავღანეთში დამატებით ჯარებს შეიყვანს
საქართველოს პრეზიდენტ მიხეილ სააკაშვილის განცხადებით, საქართველო უახლოეს თვეებში ავღანეთში დამატებით ძალებს შეიყვანს. როგორც მან მიუნხენის უსაფრთხოების 47-ე კონფერენციაზე სიტყვით გამოსვლისას განაცხადა, იმის მიუხედავად, რომ საქართველოს ტერიტორიის 20 პროცენტი ოკუპირებულია და მოსახლეობის რიცხოვნობა მხოლოდ 4 მილიონ 700 ათასია, იგი მზად არის, ავღანეთში სამშვიდობო ძალების რაოდენობა კიდევ უფრო გაზარდოს.
მისი თქმით, საქართველოს სურს, უსაფრთხოების არა მხოლოდ “მომხმარებელი’’, არამედ ,,მიმწოდებელიც” იყოს.
“ვაცნობიერებთ, რომ დიდი პასუხისმგებლობა გვაკისრია. სწორედ ამიტომ ავღანეთში ათასამდე ჯარისკაცი გავგზავნეთ. საერთაშორისო სამშვიდობო ოპერაციის (ISAF) ძალებთან ერთად, ჩვენი ძალები ჰელმანდის პროვინციაში იმყოფებიან. მომდევნო რამდენიმე თვეში ავღანეთში დამატებით ძალებს გავგზავნით. ეს იმისთვის კეთდება, რომ ავღანელმა ხალხმა მშვიდობიან ცხოვრებას მიაღწიოს და მათი ქვეყანა ტერორისტების თავშესაფრად არ იქცეს”,—აღნიშნა მიხეილ სააკაშვილმა.
