აქტუალური
შსს-ში ადამიანის უფლებათა დაცვის დეპარტამენტი შეიქმნა
საქართველო, 22 იანვარი, საქინფორმი. შინაგან საქმეთა სამინისტროში ადამიანის უფლებათა დაცვის დეპარტამენტი შეიქმნა. ამის შესახებ მთავრობის დადგენილებაშია ნათქვამი.
შესაბამისი ცვლილება „საქართველოს შინაგან საქმეთა სამინისტროს დებულების დამტკიცების შესახებ“ საქართველოს მთავრობის 2013 წლის 13 დეკემბრის 337-ე დადგენილებაში შევიდა.
მთავრობის დადგენილების თანახმად, ადამიანის უფლებათა დაცვის დეპარტამენტის ძირითადი ამოცანებია: კომპეტენციის ფარგლებში ოჯახური დანაშაულის, ქალთა მიმართ ძალადობის, დისკრიმინაციის ნიშნით შეუწყნარებლობის მოტივით ჩადენილი დანაშაულის, ტრეფიკინგის, არასრულწლოვანთა მიერ ან მათ მიმართ ჩადენილი დანაშაულის ფაქტებზე დროული რეაგირებისა და გამოძიების ეფექტიანობის უზრუნველყოფა; ადამიანის უფლებათა დამცველ სახელმწიფო ორგანოებსა და არასამთავრობო ორგანიზაციებთან თანამშრომლობა და კოორდინაცია.
განკარგულებას ხელს აწერს საქართველოს პრემიერ-მინისტრი გიორგი კვირიკაშვილი.
