საქართველო, 27 სექტემბერი, საქინფორმი. აზერბაიჯანის სამართალდამცველმა ორგანოებმა ბაქოს ცენტრალურ ქუჩებზე არატრადიციული სექსუალური ორიენტაციის წარმომადგენელთა მასობრივი დაკავება დაიწყეს. სპეცოპერაციის ჩატარების საბაბი გახდა ბაქოელთა მრავალრიცხოვანი საჩივრები, რომლებსაც მობეზრდათ საღამოობით და ღამღამობით ბაქოს ისტორიულ ცენტრში მოყიალე სექსუალურ უმცირესობათა წარმომადგენლები, რომლებიც თავიანთ ინტიმურ მომსახურებას ფულზე ყიდიან. მოქალაქეთა საჩივრებში ნათქვამი იყო, რომ ეს პირები საზოგადოებრივ წესრიგს არღვევენ, ადგილობრივ მცხოვრებთა სიმშვიდეს ხელყოფენ და დედაქალაქის იმიჯს ლახავენ.
სპეცოპერაციის შედეგად პოლიციის განყოფილებებში 100-ზე მეტი პროსტიტუტი-პედერასტი გადაიყვანეს. როგორც აზერბაიჯანის შსს-ს პრესსამსახურის ხელმძღვანელმა ეხსან ზახიდოვმა განაცხადა,  16 მათგანს უკვე აღმოაჩნდა შიდსი და სიფილისი. დაკავებულთა სამედიცინო გამოკვლევა გრძელდება.
„შიდსის და სხვა ინფექციური კანისა და ვენდაავადებათა მატარებლები საფრთხეს უქმნიან მათთან კონტაქტის მქონე ახალგაზრდების სიცოცხლესა და ჯანმრთელობას. მინდა, ხაზი გავუსვა, რომ ეს რეიდები სექსუალურ უმცირესობათა ყველა წარმომადგენელს არ მოიცავს. ვაკავებთ იმ პირებს, რომლებიც დემონსტრაციულად ამჟღავნებენ უპატივცემულობას გარშემო მყოფთა მიმართ, თავიანთი საქციელით მოქალაქეების გაღიზიანებას იწვევენ, აგრეთვე პირებს, რომლებიც, პოლიციისა და ჯანდაცვის ორგანოების ხელთ არსებული ინფორმაციით,  ინფექციური დაავადებების მატარებლები არიან“, - აღნიშნა ზახიდოვმა.