სრულიად საქართველოს კათოლიკოს–პატრიარქმა ილია მეორემ იმედი გამოთქვა, რომ წლეულს საქართველოს ძმური ვიზიტით ეწვევა ყოველთა სომეხთა კათალიკოსი გარეგინ მეორე და აღნიშნა, რომ მზადაა, გულთბილად მიიღოს სომხეთის სამოციქულო ეკლესიის მეთაური და ქართველთა და სომეხთა საუკუნოვანი საეკლესიო მეგობრობა გააგრძელოს.

დელეგაციამ საქართველოს პატრიარქს ცნობილი მხატვრის, საქართველოში მცხოვრები სომხის – ლევ ბახჩევის ნახატი უსახსოვრა. პატრიარქმა ილია მეორემ კი სტუმრებს თავისი მარნის ღვინო მიუკითხა.

მკითხველს შევახსენებთ, რომ, ქართული მხარის თხოვნით, სომეხთა კათალიკოსის – გარეგინ მეორეს ვიზიტი საქართველოში ორჯერ გადაიდო.