სამართალი
ასლან აბაშიძეს ბათუმის საქალაქო სასამართლომ 15 წლით თავისუფლების აღკვეთა მიუსაჯა
საქართველო, 12 აგვისტო, საქინფორმი. აჭარის ავტონომიური რესპუბლიკის ყოფილი მეთაურისა და მასთან დაახლოებული პირების საქმეზე გადაწყვეტილება მოსამართლე დავით მამისეიშვილმა გუშინ გამოაცხადა.
ასლან აბაშიძეს ასევე დაეკისრა მორალური ზიანის ასანაზღაურებლად ნოდარ იმნაძის ოჯახისთვის – 100 ათასი, თენგიზ ასანიძისთვის კი 30 ათასი ლარის გადახდა.
სასამართლომ გადაწყვეტილება სხვა პირებთან დაკავშირებითაც გამოაცხადა. ასლან აბაშიძის ცოლისძმას, აჭარის უშიშროების ყოფილ მინისტრს სოსო გოგიტიძეს 12-წლიანი პატიმრობა მიესაჯა. მისი დაცვის უფროსს დავით ხალვაშს კი, რომელიც უკვე თითქმის 2 წელია, პატიმრობაშია, თავისუფლების აღკვეთა 4 წლითა და 6 თვით მიესაჯა.
გარდაცვალების გამო სასჯელისგან გათავისუფლდნენ ჯემალ გოგიტიძე და ელგუჯა ჯინჭარაძე.
მკითხველს შევახსენებთ, რომ ასლან აბაშიძის წინააღმდეგ სისხლის სამართლის საქმე 2004 წელს აღიძრა – „ვარდების რევოლუციის“ სახელწოდებით ცნობილი „ფერადი“ გადატრიალების, ხელისუფლებაში დიქტატორი მიხეილ სააკაშვილის მოსვლისა და მის მიერ დანაშაულებრივი ჯგუფის, სახელწოდებით „ერთიანი ნაციონალური მოძრაობის“ შექმნის შემდეგ, რომელიც 9 წელი საქართველოში მმართველ პარტიად ითვლებოდა.
