საქართველო, 6 ივლისი, საქინფორმი. თბილისის საქალაქო სასამართლო მაგდა პაპიძის საქმესთან დაკავშირებით განცხადებას ავრცელებს, სადაც, კერძოდ, ნათქვამია:

 ”2016 წლის 4 ივლისს ნაფიცმა მსაჯულებმა გამამტყუნებელი ვერდიქტი მიიღეს და ბრალდებული 25 წლის მ.პ. დამნაშავედ ცნეს ოჯახურ დანაშაულში, კერძოდ, წინასწარი შეცნობით დამამძიმებელ გარემოებებში, მეუღლისა და მცირეწლოვანი შვილის განზრახ მკვლელობის ჩადენაში.

 თორმეტმა ნაფიცმა მსაჯულმა გამამტყუნებელი ვერდიქტი სათათბიროდ განკუთვნილ პირველივე სამ საათში - 2 საათსა და 35 წუთში, ერთხმად -12 ხმით მიიღეს. აღსანიშნავია, რომ თბილისის საქალაქო სასამართლოს პრაქტიკაში ეს პირველი პრეცედენტია, როდესაც ნაფიცმა მსაჯულებმა გამამტყუნებელი ვერდიქტი ერთხმად მიიღეს.

 საქმე ეხება 2015 წლის 19 დეკემბერს, თბილისში მომხდარ მამა-შვილის საზარელი მკვლელობის ფაქტს. მკვლელობიდან რამდენიმე საათში სამართალდამცველებმა ცხელ კვალზე დააკავეს გარდაცვლილის მეუღლე მ.პ.

 ნაფიცი მსაჯულები მონაწილეობას არ მიიღებენ სასჯელის დანიშვნის სხდომაში, რომელიც გაიმართება თბილისის საქალაქო სასამართლოში 2016 წლის 6 ივლისს, 11:00 საათზე. ჩადენილი დანაშაულისათვის სისხლის სამართლის კოდექსი 16-დან 20 წლამდე ან უვადო თავისუფლების აღკვეთას ითვალისწინებს”.