საქართველო, 28 ივნისი, საქინფორმი. ოდესის ოლქის გუბერნატორ მიხეილ სააკაშვილის განცხადებით, უკრაინაში ვითარება პუტინის რუსეთზე უარესია.

ამის შესახებ სააკაშვილმა კონფერენცია Grain Ukraine 2016-ზე სიტყვით გამოსვლისას განაცხადა.

მისი თქმით, კორუფციის კატასტროფული ზღვარიდან გამომდინარე, უკრაინა „ეკონომიკური თვალსაზრისით რუსეთზე უკეთეს მდგომარეობაში არ არის“.

„უარეს მდგომარეობაშიც კი არის. იმიტომ რომ, იქ გარკვეული გადაწყვეტილებები - ცენტრალიზებულია. იქ არის ის, რაც „მეპატრონეს“ ეკუთვნის, „უფროსს“, და ეს „უფროსი“ განკარგულებებს იძლევა. აქ კი.. სამთავრობო მექანიზმები განადგურებულია. უკრაინაში ძალიან მაღალი რანგის ჩინოვნიკსაც კი, თუ რამე კარგის გაკეთება მოუნდა, ვერ შეძლებს“,-განაცხადა სააკაშვილმა და დასძინა, რომ „რუსეთში კი თუ პუტინს შეუთანხმდი, მაშინ ყველაფერი კარგად იქნება“.

ევროკავშირიდან ბრიტანეთის გასვლაზე საუბრისას, ოდესის ოლქის გუბერნატორმა აღნიშნა, რომ უკრაინა ძალიან საშიშ პერიოდში შედის - „ევროპული მასშტაბის გარიგებების პერიოდში“.

„ევროპის დიდი ქვეყნების წამყავნი ლიდერები, რომლებიც ევროკავშირში დარჩნენ, დაიწყებენ მოლაპარაკებებს იმათთან, ვისთან მოლაპარაკება არ შეიძლება. მაგალითად, პუტინთან. მათ რუსეთის წინააღმდეგ სანქციების გაგრძელება არ სურთ“,-აღნიშნა მიხეილ სააკაშვილმა.