პოლიტიკა
„პრემიერი კვირიკაშვილი არ არის ის ადამიანი, რომელიც კითხვებზე პასუხს გაურბის“ – ზვიად კვაჭანტირაძე
საქართველო, 25 აპრილი, საქინფორმი. “ოპონენტების მოლოდინის საწინააღმდეგოდ, პრემიერის გამოსვლა ზედმიწევნით რაციონალური, საინტერესო და ჩვენი ევროპელი პარტნიორების ინტერესებს მორგებული იყო. მან ქვეყნის გამოწვევებთან დაკავშირებით უმნიშვნელოვანესი აქცენტები გააკეთა, რომ ჩვენი პარტნიორებისგან არა მხოლოდ ზოგად ფრაზებსა და თანადგომას, არამედ საქმიან, რეალურ სოლიდარობას და მხარდაჭერას ველით", - აღნიშნა კვაჭანტირაძემ.
უმრავლესობის ლიდერმა ასევე განაცხადა, რომ პრემიერის გამოსვლის შემდეგ სერიოზული კრიტიკოსები კვირიკაშვილის გამოსვლით კმაყოფილებას არ მალავდნენ.
“მონიტორინგის კომიტეტის ხელმძღვანელი, რომელიც ყოველთვის კრიტიკულად იყო განწყობილი, პირდაპირ მოვიდა და გვითხრა - ძალიან კარგი პრემიერი გყოლიათო. ასევე, მოვიდა სომხეთის პარლამენტის პირველი ვიცე-სპიკერი და თქვა, რომ ჩვენი პრემიერის გამოსვლით ამაყობს, რადგან მან ქვეყანა ღირსეულად წარმოაჩინა”, - განაცხადა ზვიად კვაჭანტირაძემ.
