პოლიტიკა
„საბჭოთა ოკუპაციის დღეს ჩვენი ჯარის შენაერთებმა თავდადებული გმირობა აჩვენეს“ – პრემიერი კვირიკაშვილი
საქართველო, 26 თებერვალი, საქინფორმი. საქართველოს პრემიერ–მინისტრი გიორგი კვირიკაშვილი "საბჭოთა ოკუპაციის დღის" ტრაგიკულ თარიღს გამოეხმაურა.
„დღეს არის საბჭოთა ოკუპაციის დღე. ეს არის დღე, როდესაც უამრავმა ადამიანმა, ესენი იყვნენ ჩვენი ჯარის შენაერთები, სახალხო გვარდია და მოხალისეები, წინასწარ გადაწყვეტილ ბრძოლაში თავდადებული გმირობა აჩვენეს. მიუხედავად იმისა, რომ ბრძოლა წაგებით დასრულდა, საბოლოო ჯამში საქართველოს სუვერენიტეტის შენარჩუნებისთვის ომი მოგებულია. ის, რომ დღეს ამ შენობის თავზე საქართველოს დროშა ფრიალებს, ის, რომ დღეს ჩვენ შეგვიძლია მივიღოთ ჩვენი სუვერენული გადაწყვეტილებები, თუნდაც საქართველოს დასავლური კურსის თაობაზე, არის დამსახურება ამ ადამიანების და კიდევ არაერთი გმირის, რომლებმაც საკუთარი სიცოცხლე გაწირეს ჩვენი ქვეყნის დამოუკიდებლობისთვის. მათი მაგალითი კიდევ დიდხანს, ბევრი საუკუნის განმავლობაში გაუნათებს გზას ჩვენს მომავალ თაობებსაც", – აღნიშნა პრემიერმა მთავრობის სხდომის დაწყების წინ.
