საქართველო, 5 იანვარი, საქინფორმი. მას შემდეგ, რაც სასჯელაღსრულების მინისტრმა კახა კახიშვილმა მოზარდის წერილი მიიღო, მსჯავრდებული საპატიმროდან გაათავისუფლა.

 „13 წლის ვარ და მამა მხოლოდ ერთხელ ვნახე, როცა 5 წლის ვიყავი და მისი სახეც აღარ მახსოვს. მამასთან ტელეფონით საუბრის დროს გავიგე, რომ ის ქ. რუსთავის N 16 დაწესებულებაშია. გთხოვთ, გაათავისუფლოთ მამიკო ამ ახალ წლამდე. მინდა, რომ ახალ წელს ერთად შევხვდეთ. ან კიდევ, გავიგე, რომ არსებობს პროექტი, როდესაც პატიმარს შაბათ-კვირას სახლში უშვებენ, თუ შეგიძლიათ, გთხოვთ დამეხმაროთ. მადლობა, წინასწარ”, – ეს წერილი მინისტრმა 13 წლის მოზარდისგან, რომელიც ქუთაისში მიუსაფარ ბავშვთა სოფელში ცხოვრობს, 10 დეკემბერს მიიღო.

კახა კახიშვილის გადაწყვეტილებით, მსჯავრდებულ გ.გ-ს საქმე ადგილობრივმა საბჭომ განიხილა და მისი პირობით ვადამდე გათავისუფლების გადაწყვეტილება მიიღო.

გ.გ- მ მე-16 დაწესებულება 31 დეკემბერს დატოვა და სამინისტროს დახმარებით შვილთან შესახვედრად საახალწლო საჩუქრებით გაემგზავრა.

„არ ველოდებოდი გათავისუფლებას, არც ვიცოდი არაფერი. მადლობა მინდა გადავუხადო ჩემს შვილს, რომელმაც წერილი მიწერა მინისტრს და ჩემი განთავისუფლება სთხოვა. ათი წელია ბავშვი არ მინახავს, ჩემი სახეც კი არ ახსოვს. ეხლა პირდაპირ მასთან წავალ, არ იცის რომ გამომიშვეს და რომ დამინახავს ალბათ ძალიან გაუხარდება”, – განაცხადა გ.გ.-მ.

გ.გ.-ს გარდა, სასჯელაღსრულებისა და პრობაციის სამინისტრო გადაწყვეტილებით, ახალ წელს სახლში 149 მსჯავრდებული შეხვდა. ისინი ვადაზე ადრე გაათავისუფლეს.მათ შორის ოთხი ქალბატონი და სამი არასრულწლოვანია.