საზოგადოება
ბათუმში ისტორიული შენობა იყიდება

samShobiaro-saxliბათუმში სამშობიარო სახლის ისტორიული შენობა, რომელიც რუსთაველის ქუჩაზე სასტუმრო „შერატონის“ გვერდით მდებარეობს, შესაძლოა, გაიყიდოს.

იგი გასულ საუკუნეში, 1951 წელს გაიხსნა. მეფის რუსეთის დროს აქ გუბერნატორის რეზიდენცია იყო განთავსებული, დღეს კი ისტორიული შენობის მფლობელი სახელმწოფოა. ამ ეტაპზე სამშობიარო სახლი საპრივატიზაციო ობიექტების ნუსხაში არ არის, თუმცა შენობის შესაძლო გაყიდვა აქტიურად განიხილება.

სამშობიაროს თანამშრომლები კომენტარისგან თავს იკავებენ და ამბობენ, რომ სამშობიარომ, შესაძლოა, ადგილსამყოფელი შეიცვალოს, მაგრამ მისი დახურვა არ იგეგმება.

შენობის შესაძლო გაყიდვის ფაქტს არ გამორიცხავს აჭარის ჯანდაცვის მინისტრი ლევან ანთაძე, რომლის განცხადებითაც 2011 წლიდან ლიცენზირების ახალი წესები შემოდის, რომელსაც დღეს არსებული ვერც ერთი საავადმყოფო ვერ აკმაყოფილებს. მინისტრის განცხადებით, სამშობიაროს გაყიდვა დღეს დღის წესრიგში არ დგას, მაგრამ თუ ხვალ ეს აქტუალური გახდება, ლევან ანთაძე ვერც ამაში ხედავს პრობლემას.

უკმაყოფილებას გამოთქვამს ბათუმის მოსახლეობა. მათი მოთხოვნაა, რომ ეს ისტორიული შენობა მთავრობის მიერ გაყიდული ობიექტების დიდ ნუსხას არ შეემატოს, წინააღმდეგ შემთხვევაში ისინი საპროტესტო გამოსვლებს მოაწყობენ.