პოლიტიკა
„ვიმედოვნებ, საქართველოს მოქალაქეებს ძალიან მალე ექნებათ ევროპაში თავისუფალი გადაადგილების საშუალება“ - ალგირდას ბუტკევიჩიუსი
საქართველო, 5 ნოემბერი, საქინფორმი. ამის შესახებ ლიტვის რესპუბლიკის პრემიერ-მინისტრმა ალგირდას ბუტკევიჩიუსმა ქართველ კოლეგა ირაკლი ღარიბაშვილთან შეხვედრის შემდეგ განაცხადა.
ლიტველ კოლეგას მასპინძლობისთვის მადლობა გადაუხადა საქართველოს პრემიერ-მინისტრმა. ირაკლი ღარიბაშვილის განცხადებით, ასოცირების ხელშეკრულების განხორციელება მთავრობის უმნიშვნელოვანესი პრიორიტეტია. ამ კონტექსტში საქართველოს პრემიერ-მინისტრმა ხაზგასმით აღნიშნა საქართველოს მიერ ვიზის ლიბერალიზაციის სამოქმედო გეგმის წარმატებული შესრულება და ამ მიმართულებით ევროკავშირის პოზიტიური დასკვნის იმედი გამოთქვა.
„ჩვენ ასევე განვიხილეთ ნატო-ში ინტეგრაციის პროცესი, ვისაუბრეთ ნატო-სა და ევროკავშირის ეგიდით მიმდინარე საერთაშორისო ოპერაციებში საქართველოს მონაწილეობის შესახებ. განვიხილეთ საქართველოს ოკუპირებულ რეგიონებში - აფხაზეთსა და ე.წ სამხრეთ ოსეთში არსებული ვითარება“, - განაცხადა საქართველოს პრემიერ-მინისტრმა.
ერთობლივი განცხადებები მედიისთვის ორი ქვეყნის მთავრობის მეთაურებმა შეხვედრის შემდეგ გააკეთეს.
