საქართველო, 21 ოქტომბერი, საქინფორმი. ბიზნესმენი ქიბარ ხალვაში ავრცელებს მორიგ განცხადებას, სადაც, კერძოდ, ნათქვამია: „კერძო საკუთრების სამართლიანად, სასამართლოს გზით დაბრუნების საქმეში ჩემი ბრძოლის დასაწყისშივე, დავაში ნაციონალური მოძრაობის პროპაგანდისტული მანქანა ჩაერთო, რომელიც გამუდმებით აკეთებს აქცენტს ტელეკომპანია „რუსთავი 2“-ის დახურვის შესახებ. „რუსთავი 2“–ის რეალური მეპატრონე, ყოფილი პრეზიდენტი მიშა სააკაშვილი გეგმავს „რუსთავი 2“-ის დახურვას და ამ ფონზე პოლიტიკური დივიდენდების მიღებას „ნაციონალური მოძრაობისთვის“. ვაცხადებ ღიად და საჯაროდ – მიშა სააკაშვილს „რუსთავი 2“–ს არ დავახურინებ!

აქვე მინდა საზოგადოებას შევახსენო, რომ გასულ კვირას საჯარო განცხადებით ღია ეთერში დებატებში გამოვიწვიე „რუსთავი 2“–ის ნომინალური მფლობელები, ყარამანაშვილები. როგორც მოსალოდნელი იყო, არავინ გამოგვხმაურებია. ეს ფაქტიც ცხადყოფს, რომ ყარამანაშვილები არიან ნომინალურად დანიშნული მეწილეებად და „რუსთავი 2“–ის რეალური პატრონი დღეს არის ოდესის გუბერნატორი მიშა სააკაშვილი. სასაუბროდ ვიწვევ „რუსთავი 2“–ის რეალურ პატრონს, მიშა სააკაშვილს.

მიშა სააკაშვილი ვალდებულია ყველა კითხვას გასცეს პასუხი, რაც საზოგადოებას „რუსთავი 2“–ის წართმევა–ჩამორთმევის პერმანენტულ პროცესთან დაკავშირებით მის მიმართ გააჩნია. კეთილი ინებოს და ჩემთან, მის მიერ ყოვლად უსამართლოდ დატერორებულ ადამიანთან, დაჯდეს პირდაპირ ეთერში.