საქართველო, 15 ოქტომბერი, საქინფორმი. მედიაში გავრცელებულ ინფორმაციასთან დაკავშირებით მთავარი პროკურატურა ავრცელებს განცხადებას, სადაც, კერძოდ, ნათქვამია: „2015 წლის 12 ოქტომბერს, ტელეკომპანია „რუსთავი 2“-ის ეთერით მოსამართლე თამაზ ურთმელიძეზე გავრცელებული ინფორმაცია არის ტყუილი. მოსამართლე თამაზ ურთმელიძე იხილავს სამოქალაქო სამართლებრივ დავას ქიბარ ხალვაშსა და ტელეკომპანია „რუსთავის 2“-ის დამფუძნებლებს შორის. ადგილი აქვს მცდელობას, რომ საზოგადოებას აჩვენონ თითქოსდა პროკურატურა ჩართულია ამ პროცესში, მაშინ როდესაც ტელეკომპანიას არცკი უკითხავს საქართველოს პროკურატურისთვის მოსამართლის დედის მდინარა გიორგობიანის მიმართ არსებული გამოძიების მიმდინარეობის შესახებ.

2014 წლის 7 იანვარს, ქ. თბილისში, ურთიერთშელაპარაკების შედეგად, მდინარა გიორგობიანმა სიძეს - ვალერიან სილაქაძეს ნაჯახის დარტყმით მარცხენა ხელზე ჭრილობა მიაყენა.

მდინარა გიორგობიანის ქმედების დაკვალიფიცირება მოხდა 118-ე მუხლის პირველი ნაწილით და არა მკვლელობის მცდელობით, რომლის დახატვასაც ცდილობს „რუსთავი 2“.

2015 წლის 24 სექტემბერს, ვალერიან სილაქაძე ცნობილი იქნა დაზარალებულად, ხოლო 12 ოქტომბერს მდინარა გიორგობიანი მიცემული იქნა სისხლის სამართლის პასუხისგებაში.