საქართველო, 20 აგვისტო, საქინფორმი. კარგი იქნებოდა, საქართველოს პრეზიდენტს გაერო-ს გენერალურ ასამბლეაზე სიტყვით გამოსვლის საშუალება მისცემოდა, - ამის შესახებ საგარეო ურთიერთობათა საკითხებში საქართველოს პრეზიდენტის მრჩეველმა თენგიზ ფხალაძემ გუშინ გამართულ პრესკონფერენციაზე განაცხადა.

„29 სექტემბერს ნიუ იორკში იმართება მაღალი დონის დისკუსია, რომელიც ეძღვნება აღმოსავლეთ ევროპის მომავალს და ქალთა როლის გაძლიერებას. ეს არის მაღალი დონის ღონისძიება, რომელშიც მონაწილეობას მიიღებს სხვა რამდენიმე ქვეყნის პრეზიდენტი. საქართველოს პრეზიდენტს დადასტურებული აქვს ამ ღონისძიებაზე დასწრება”, – განაცხადა, კერძოდ, ფხალაძემ.

გაერო-ს თემასთან დაკავშირებით კი ფხალაძემ ხაზგასმით აღნიშნა:

„რახან პრეზიდენტი იმ პერიოდში არის აშშ-ში, როდესაც იხსნება გაერო-ს გენასამბლეის გენერალური დებატები, კარგი იქნებოდა, რომ მას საშუალება მისცემოდა და გენერალურ ასამბლეაზე სიტყვით გამოსულიყო. როგორც წესი, პატარა ქვეყნები იყენებენ ამ შესაძლებლობას იმ ფაქტორების გამოც, რაც მოგახსენეთ; ასევე იმის გამოც, რომ გაერო-ში არის ტრადიციები, წესები – როდესაც იხსნება გენერალური დებატები, პირველ რიგში, სიტყვით გამოდიან სახელმწიფოების მეთაურები, ამის შემდეგ გამოდიან მთავრობის მეთაურები და სხვა წარმომადგენლები. აქედან გამოდინარე, პატარა ქვეყნები და ზოგადად სახელმწიფოები ცდილობენ, ეს საშუალება მაქსიმალურად გამოიყენონ, რათა უფრო აქტუალურ ფორმატში იყოს წარმოჩენილი ის პრობლემატიკა, რომელზედაც სურს საუბარი დელეგაციის ხელმძღვანელს”, – განაცხადა ფხალაძემ.