პოლიტიკა
„ქიბარ ხალვაში მიმართავს სასამართლოს, რათა თავისი დარღვეული უფლებები აღიდგინოს. საბოლოო გადაწყვეტილება სასამართლომ უნდა მიიღოს“ - ირაკლი ღარიბაშვილი
საქართველო, 10 აგვისტო, საქინფორმი. მე, როგორც პრემიერ-მინისტრი და როგორც მოქალაქე, ყოველგვარი სამართლიანობის აღდგენის მომხრე ვარ, თუმცა, ვფიქრობ, ეს არის დავა ორ სუბიექტს შორის, რომელსაც სასამართლო გადაწყვეტს, - ამის შესახებ პრემიერ-მინისტრმა ირაკლი ღარიბაშვილმა „რუსთავი 2“-ის მესაკუთრეობასთან დაკავშირებული საკითხის კომენტირებისას განაცხადა.
„ჩვენი მთავრობის გაცხადებული პოლიტიკაა მედიის მაქსიმალური ხელშეწყობა და ის, რომ საქართველოში არსებობდეს ძლიერი და თავისუფალი მედია. ჩვენთვის ყველაზე მნიშვნელოვანია, მაქსიმალურად შევუწყოთ ხელი თავისუფალი მედიის განვითარებას. ყველამ ნახა ამ სამი წლის განმავლობაში, რომ ჩვენ მაქსიმალურად ვეხმარებით მედიას და ის დღეს აბსოლუტურად თავისუფალია. რაც შეეხება კონკრეტულ დავას, ამაზე კომენტარს ვერ გავაკეთებ. მოვისმინე მედიით, რომ ქიბარ ხალვაში მიმართავს სასამართლოს, რათა თავისი დარღვეული უფლებები აღიდგინოს. ვერაფერს დავამატებ გარდა იმისა, რომ საბოლოო გადაწყვეტილება სასამართლომ უნდა მიიღოს“, - აღნიშნა ირაკლი ღარიბაშვილმა.
