პოლიტიკა
ბავშვთა დაცვის საერთაშორისო დღესთან დაკავშირებით, პრემიერ-მინისტრმა მეუღლესა და შვილებთან ერთად, „სოლიდარობის ფონდის“ მიერ დაფინანსებულ ბავშვებს უმასპინძლა
საქართველო, 2 ივნისი, საქინფორმი. ირაკლი ღარიბაშვილმა ბავშვებს მიულოცა და მშვიდობა, ჯანმრთელობა და ბედნიერი მომავალი უსურვა.„დღეს არის ძალიან ლამაზი დღე - მე ვხვდები "სოლიდარობის ფონდის" მიერ დაფინანსებულ ბავშვებს, მათ მშობლებს და ვხედავთ, რომ სიცოცხლე გრძელდება. ჩვენ შევძელით მათი დახმარება და ეს არის ჩემთვის ყველაზე დიდი ბედნიერება, ეს არის ძალიან კარგი საქმე და, როგორც ჩვენ უკვე ვამბობთ, სიკეთე გადამდებია. ფონდში 3 მილიონ ლარზე მეტი შეგროვდა და 112 ბავშვის დაფინანსება მოვახერხეთ, რომელთა ნახევარს საზღვარგარეთ უმკურნალეს. მადლობა ღმერთს, ეს ბავშვები ყველანი იქნებიან ძალიან კარგად", - განაცხადა ირაკლი ღარიბაშვილმა და მადლობა გადაუხადა ყველას, ვინც "სოლიდარობის ფონდის" საქმიანობაში მონაწილეობს. ბავშვებს პრემიერ-მინისტრისგან საჩუქრად პლანშეტური კომპიუტერები გადაეცათ.
პატარებმა და მათმა მშობლებმა, პრემიერთან, მის მეუღლესა და შვილებთან ერთად, სამახსოვრო ფოტოებიც გადაიღეს.
