კურატორები: მინდია ჯანელიძემ აშშ-ის თავდაცვის მდივნის თანაშემწის მოადგილე ეველინ ფარკასსა და სახელმწიფო მდივნის თანაშემწის მთავარ მოადგილე ტოდ ჩაპმანს უმასპინძლა
საქართველო, 24 აპრილი,
საქინფორმი. თავდაცვის მინისტრმა
მინდია ჯანელიძემ აშშ-ის წარმომადგენლობითი დელეგაციის საქართველოში ვიზიტის მნიშვნელობა ხაზგასმით აღნიშნა. მხარეებმა თავდაცვის სფეროში ორმხრივი კონსულტაციების შედეგები და სამომავლო თანამშრომლობის მიმართულებები განიხილეს. შეხვედრაზე საუბარი შეეხო საქართველოს უსაფრთხოებისა და თავდაცვითი შესაძლებლობების განვითარების საკითხებს, ასევე, ნატო-საქართველოს არსებითი პაკეტის განხორციელებას.
აშშ-ის თავდაცვის მდივნის თანაშემწის მოადგილე ეველინ ფარკასმა დადებითად შეაფასა გამართული ორმხრივი კონსულტაციების შედეგები და კიდევ ერთხელ გამოხატა აშშ-ის მტკიცე მხარდაჭერა საქართველოს ნატოში გაწევრიანების მიმართ.
შეხვედრას საქართველოს თავდაცვის მინისტრის მოადგილე ლევან ღირსიაშვილი, საქართველოში აშშ-ის ელჩი რიჩარდ ნორლანდი, აშშ-ის სამხედრო ატაშე, პოლკოვნიკი მეთიუ დიმიკი და დელეგაციის სხვა წევრები დაესწრნენ.