სამართალი
საქართველოს პროკურატურა მოქალაქე ბესარიონ ხარძიანის გარდაცვალების ფაქტზე ღრმა მწუხარებას გამოთქვამს და უსამძიმრებს გარდაცვლილის ოჯახის წევრებს
საქართველო, 30 მარტი, საქინფორმი. საქართველოს პროკურატურა ავრცელებს განცხადებას ბ. ხარძიანის მკვლელობასთან დაკავშირებით, სადაც, კერძოდ, ნათქვამია:
„შეიქმნა სპეციალური საგამოძიებო ჯგუფი, რომელმაც დაიწყო გამოძიება სისხლის სამართლის კოდექსის 19, 108 მუხლით, რაც გულისხმობს მკვლელობის მცდელობას. ვინაიდან ბ. ხარძიანი მიყენებული ჭრილობების შედეგად საავადმყოფოში გარდაიცვალა, მუხლი გადაკვალიფიცირდა და გამოძიება გრძელდება სისხლის სამართლის კოდექსის 108-ე მუხლით, რაც გულისხმობს განზრახ მკვლელობას.
ამ ეტაპზე საქმეზე ინტენსიურად მიმდინარეობს პირველადი და გადაუდებელი საგამოძიებო მოქმედებები, კერძოდ, მიმდინარეობს შემთხვევის ადგილის დათვალიერება, დაინიშნა საჭირო ექსპერტიზები, მიმდინარეობს დაკითხვები და ოპერატიულ-სამძებრო მოქმედებები.
საქართველოს პროკურატურა გამოძიების ინტერესების გათვალისწინებით საზოგადოების ინფორმირებას გამოძიების მიმდინარეობის შესახებ პერიოდულად მოახდენს“, - ნათქვამია აღნიშნულ განცხადებაში.
