სამართალი
გომელაური ნარკოტიკების წინააღმდეგ ბრძოლის სააგენტოსა და ანტინარკოტიკული და სამართალდამცავ ორგანოებთან ურთიერთობების საერთაშორისო ბიუროს ხელმძღვანელებს შეხვდა
საქართველო, 25 თებერვალი, საქინფორმი. შს მინისტრმა ვახტანგ გომელაურმა შეხვედრა გამართა ნარკოტიკების წინააღმდეგ ბრძოლის სააგენტოს (DEA) სტამბოლის ოფისის და სახელმწიფო ანტინარკოტიკული და სამართალდამცავ ორგანოებთან ურთიერთობების საერთაშორისო ბიუროს (INL) ხელმძღვანელ პირებთან.
მხარეებმა შსს-სა და ნარკოტიკების წინააღმდეგ ბრძოლის სააგენტოს შორის თანამშრომლობის გაღრმავების სამომავლო პერსპექტივები განიხილეს. მინისტრმა ასევე ისაუბრა შს სამინისტროს შესაძლებლობების განვითარების კუთხით ამერიკის მხარდაჭერის მნიშვნელობაზე და ამ პროცესში აშშ-ს სახელმწიფო დეპარტამენტის პროგრამებისა და ბიუროების როლის შესახებ. მინისტრთან ერთად შეხვედრას ესწრებოდნენ შსს-ს შესაბამისი დეპარტამენტების ხელმძღვანელი პირები. 
