საქართველო, 26 იანვარი, საქინფორმი. საქართველოს ექსპრეზიდენტმა მიხეილ სააკაშვილმა უკრაინაში შექმნა შტაბი, სადაც, თავის მომხრეებთან ერთად, ამუშავებს სამშობლოში დაბრუნების გეგმას, იტყობინება პარასკევს თბილისური გაზეთი „ალია“. მისი წყაროს ინფორმაციით, ამ ჩანაფიქრის ნაწილს წარმოადგენს დივერსიები სტრატეგიული დანიშნულების სხვადასხვა ობიექტზე, რათა საქართველოში ქაოსი და არეულობა გამოიწვიოს. გეგმის ცენტრალური ნაწილი კი მილიარდერისა და მმართველი კოალიცია „ქართული ოცნების“ დამფუძნებლის, ყოფილი პრემიერ-მინისტრი ბიძინა ივანიშვილის ლიკვიდაციაა, რომელმაც მოახერხა მოქალაქეთა გაერთიანება და 2012 წლის არჩევნებზე სააკაშვილის ჩამოშორება ხელისუფლებიდან.

გაზეთის დაუსახელებელი რესპონდენტის თქმით, ივანიშვილის მკვლელობა დავალებული აქვს პროფესიონალთა ჯგუფს. ამას წინათ სააკაშვილმა, რომელის საქართველოს სს კოდექსის ოთხი მუხლითაა ბრალდებული (ეს კი 12 წლით თავისუფლების აღკვეთას ითვალისწინებს), საჯაროდ განაცხადა, რომ წელს დაბრუნდება, თუმცა, ცხადია, არა იმისათვის, რომ ხელისუფლებას ჩაბარდეს.

„ალია“ აღნიშნავს, რომ ცნობილი უფლებათადამცველი იური ვაზაგაშვილის მკვლელობა 20 იანვარს მისი ვაჟის, წინა რეჟიმის მსხვერპლი ზურაბის საფლავზე, სავარაუდოდ, შემუშავებული გეგმის ნაწილია. ეს გამოწვევაა ამჟამინდელი ხელისუფლებისთვის, და ასევე, საზოგადოებაში დაუცველობის ატმოსფეროს შექმნის შესაძლო დასაწყისი, - აღნიშნავს გამოცემა. გაზეთის ცნობით, ბიძინა ივანიშვილი შსს-სა და მთავარი პროკურატურის მუშაობის გააქტიურებას მოითხოვს. ამ უკანასკნელმა კი უკვე სთხოვა ინტერპოლს სააკაშვილის საერთაშორისო ძებნაში გამოცხადება.