უცხოეთი
ყარაბაღის თავდაცვის სამინისტრო: კონფლიქტის ზონაში სიტუაცია დაიძაბა
საქართველო, 14 ნოემბერი, საქინფორმი. ყარაბაღი-აზერბაიჯანის შეხების ხაზზე სიტუაცია დაიძაბა. დღე-ღამის განმავლობაში აზერბაიჯანის მხარემ ცეცხლის შეწყვეტის რეჟიმი 250-ჯერ მაინც დაარღვია, - იტყობინება რია ნოვოსტი არაღიარებული მთიანი ყარაბაღის რესპუბლიკის თავდაცვის სამინისტროს პრესცენტრზე დაყრდნობით.
„იმასთან დაკავშირებით, რომ 12 ნოემბერს სამიჯნე ხაზის აღმოსავლეთ მონაკვეთზე აზერბაიჯანის მხარემ ჩამოაგდო შვეულმფრენი Ми-24 ВВС НКР, სიტუაცია წინა ხაზზე დაიძაბა“, - ნათქვამია ცნობაში.
კერძოდ, აზერბაიჯანის მხარემ დღე-ღამის განმავლობაში ცეცხლის შეწყვეტის რეჟიმი 250-ჯერ მაინც დაარღვია, რის შედეგადაც ყარაბაღის პოზიციების მიმართულებით სხვადასხვა კალიბრის ცეცხლსასროლი იარაღიდან 3 ათასზე მეტი გასროლა განხორციელდა.
„არაღიარებული ყარაბაღის რესპუბლიკის თავდაცვის არმიის მოწინავე ქვედანაყოფები, ძირითადად, ცეცხლის შეწყვეტის რეჟიმს იცავდნენ და საპასუხო მოქმედებებს მხოლოდ უკიდურესი აუცილებლობის შემთხვევაში ახორციელებდნენ“, - ნათქვამია ცნობაში.
