პოლიტიკა
ალასანია: „ეს უკვე გამოკვეთილი გეგმაა გარკვეული ძალების რუსეთის ფედერაციაში, რომ კიდევ უფრო მეტი ზემოქმედება მოახდინონ ქართულ საზოგადოებაზე და ამას ხშირად იტაცებს ქართული საზოგადოების შიგნით სოკოებივით ამოშლილი ორგანიზაციები!“
საქართველო, 26 ივნისი, საქინფორმი. ირაკლი ალასანიამ ცხინვალის რეგიონში რეფერენდუმის შესაძლო გამართვასთან დაკავშირებით ჟურნალისტის შეკითხვას უპასუხა.
"ნებისმიერი დე-ფაქტო ცხინვალის რეგიონში, მათ მთავრობაში, მათ მიერ ჩატარებული არჩევნები, რეფერენდუმი, პლებისციტი მოკლებულია ყველანაირ საერთაშორისო სამართლებრივ და საქართველოს კანონმდებლობით ნებისმიერ შედეგებს. ამას არ ექნება არანაირი მნიშვნელობა, არც საერთაშორისო თანამეგობრობისთვის, არც ჩვენთვის. რადგან, ეთნიკური წმენდის შედეგად გამოდევნილი ქართული მოსახლეობა და არა მარტო ქართული, არ იღებს მონაწილეობას ამ დადგმულ სპექტაკლში.
ერთი არის, რაც აღნიშვნის ღირსია, ეს უკვე გამოკვეთილი გეგმაა გარკვეული ძალების რუსეთის ფედერაციაში, რომ კიდევ უფრო მეტი ზემოქმედება მოახდინონ ქართულ საზოგადოებაზე და როგორც ხედავთ, ამას ხშირად იტაცებს ქართული საზოგადოების შიგნით სოკოებივით ამოშლილი პოლიტიკური თუ არასამთავრობო ორგანიზაციები. ეს არის გეგმა, რომელიც დაისახა უმაღლეს პოლიტიკურ წრეებში გარკვეული პერიოდის წინ და იმ გეგმის მიხედვით ვითარდება მოვლენები. ამიტომ, ჩვენ ამ გეგემის ნაწილი არ უნდა გავხდეთ, არ უნდა ავყვეთ, ჩვენ ჩვენი ხედვა გვაქვს საქართველოს ტერიტორიული მთლიანობის აღდგენისაც, ამას პროცესში დაჭირდება შერიგება, ჰუმანიტარული, სხვა სახის ურთიერთობების წინ წამოწევა, რა თქმა უნდა ამას სამხედრო გადაწყვეტა არ აქვს" - განაცხადა საქართველოს თავდაცვის მინისტრმა.
