აქტუალური
ნატოს სამხედრო კომიტეტისა და ქართული მხარის შეხვედრა
საქართველო, 23 მაისი, საქინფორმი. ბრიუსელში, ნატო-საქართველოს კომისიის ფარგლებში, სამხედრო კომიტეტისა და საქართველოს შეხვედრა გაიმართა. მხარეებმა სამხედრო თანამშრომლობის მიმდინარე საკითხები და ქართული სპეციალური ოპერაციების ძალების განვითარების გეგმები განიხილეს. საუბარი შეეხო რეგიონში არსებულ უსაფრთხოების გარემოსაც.
ნატოს შტაბბინაში, ალიანსის წევრი და პარტნიორი ქვეყნების შტაბების უფროსების 171-ე შეხვედრის ფარგლებში, გენერალ-მაიორმა ვახტანგ კაპანაძემ მოკავშირეთა ევროპული ძალების მთავარსარდალთან, გენერალ ფილიპ ბრიდლავთან გამართა შეხვედრა. საუბრისას მხარეებმა რეგიონული უსაფრთხოებისა და თავდაცვის სფეროში ორმხრივი თანამშრომლობის საკითხები განიხილეს. გენერლებმა ISAF-ის მისიაში საქართველოს კონტრიბუციისა და 2014 წლის შემდეგ მისიაში „გადამწყვეტი მხარდაჭერა" (Resolute Support Mission) საქართველოს მონაწილეობაზე იმსჯელეს.
ბრიუსელში ვიზიტის ფარგლებში გენერალ-მაიორი ვახტანგ კაპანაძე პოლონეთისა და ნიდერლანდების სამეფოს სამხედრო წარმომადგენლებსაც შეხვდა. გენერალური შტაბის უფროსმა უცხოელ კოლეგებთან სამხედრო თანამშრომლობის საკითხები განიხილა.
