აქტუალური
პრემიერი ირაკლი ღარიბაშვილი საფრანგეთის პრეზიდენტ ფრანსუა ოლანდს შეხვდა
საქართველო, 25 მარტი, საქინფორმი. საქართველოს მაისში საფრანგეთის პრეზიდენტი ეწვევა. ფრანსუა ოლანდისა და საქართველოს პრემიერ-მინისტრ ირაკლი ღარიბაშვილის შეხვედრა ჰააგაში, ბირთვული უსაფრთხოების სამიტის ფარგლებში დღეს გაიმართა. საქართველოს მთავრობის მეთაურმა კმაყოფილება გამოთქვა საფრანგეთის პრეზიდენტის საქართველოში დაგეგმილი ვიზიტის გამო და აღნიშნა, რომ ეს ორი ქვეყნის მეგობრული და პარტნიორული ურთიერთობის კიდევ ერთი დადასტურებაა.
შეხვედრაზე მხარეებმა ურთიერთთანამშრომლობის საკითხებზე იმსჯელეს. განსაკუთრებული ყურადღება გამახვილდა საქართველოს ევროინტეგრაციის პროცესებში საფრანგეთის როლზე. ფრანგული მხარის სურვილია, უფრო აქტიურად ჩაერთოს საქართველოს ევროკავშირთან თანამშრომლობის გაღრმავების მიმართულებით, რაც უკვე გამოიხატა ვილნიუსის სამიტზე ერთობლივი დეკლარაციის მიღებისას.
პრემიერმა ფრანსუა ოლანდს ქვეყანაში მიმდინარე პოლიტიკურ-ეკონომიკური პროცესებისა და არსებული ბიზნესგარემოს შესახებ ინფორმაცია მიაწოდა. გამოითქვა ეკონომიკური თანამშრომლობის კიდევ უფრო გაღრმავების სურვილი. როგორც შეხვედრაზე აღინიშნა, 2014 წლისათვის საქართველოში საფრანგეთის განვითარების სააგენტოს (AFD) ოფისის გახსნა იგეგმება.
ირაკლი ღარიბაშვილმა მადლობა გადაუხადა საფრანგეთის პრეზიდენტს საქართველოს ტერიტორიულ მთლიანობისა და სუვერენიტეტის მტკიცე მხარდაჭერისთვის.
