საქართველო, 7 მარტი, საქინფორმი. აშშ-მა უარი განაცხადა ყირიმში 16 მარტს დაგეგმილი რეფერენდუმის ლეგიტიმურობის ცნობაზე ნახევარკუნძულის რუსეთთან შეერთების შესახებ. ამის შესახებ სააგენტო „ფრანს-პრესი“ იუწყება.

ვაშინგტონში აღნიშნეს, რომ ყირიმთან დაკავშირებული ნებისმიერი გადაწყვეტილება შესაძლებელია მიღებული იქნეს მხოლოდ კიევში უკრაინის ცენტრალური ხელისუფლების მიერ. „არ შეიძლება არსებობდეს ისეთი სიტუაცია, სადაც ქვეყნის ლეგიტიმური მთავრობა სახელწიფოს ცალკეულ ნაწილებთან დაკავშირებული გადაწყვეტილების მიღებიდან გამოირიცხება“, - განუცხადეს ჟურნალისტებს თეთრ სახლში.

ყირიმში 16 მარტს უნდა გაიმართოს რეფერენდუმი ტერიტორიის მომავალი სტატუსის შესახებ. ბიულეტენში დასმული იქნება ორი კითხვა: „მომხრე ხართ თუ არა რფ-ის შემადგენლობაში  ყირიმის ავტონომიური რესპუბლიკის სუბიექტად შესვლისა?“ და „მომხრე ხართ თუ არა ყირიმის 1992 წლის კონსტიტუციის აღდგენისა და ყირიმის, როგორც უკრაინის ნაწილის, შენარჩუნებისა?“.

რეფერენდუმის არაკანონიერების შესახებ ევროკავშირის წარომადგენლებიც აცხადებდნენ. ასე მაგალითად, ევროკავშირის ელჩმა კიევში იან ტომბინსკიმ განაცხადა, რომ უკრაინის ტერიტორიის ცვლილების საკითხი მხოლოდ საყოველთაო რეფერენდუმზე შეიძლება გადაწყდეს.