საქართველო, 24 თებერვალი, საქინფორმი. საქართველოს მასშტაბით 81 ახალი ამბულატორიის მშენებლობა იწყება, რისთვისაც საქართველოს მთავრობამ 2,4 მილიონი ლარი გამოყო.

ყველა ამბულატორია სტანდარტულია და ჯამში 31-33 კვ.მ-ია. შენობა მომზადებულია სენდვიჩპანელებისგან, რომელიც 2 გამათბობლითა და 2 სველი წერტილით აღიჭურვება. შენობის გარე და შიდა ინფრასტრუქტურა ადაპტირებული იქნება შეზღუდული შესაძლებლობის მქონე პირებისათვის. ამბულატორიების კონსტრუქციები საქართველოში იწყობა და მას ლილოში არსებულ ქარხანაში აწარმოებენ.

მას შემდეგ, რაც მუნიციპალური განვითარების ფონდი შენობების ინფრასტრუტურის მოწყობას დაასრულებს, ამბულატორიები ჯანდაცვის სამინისტროს დაქვემდებარებაში გადავა, აღიჭურვება და ადგილობრივ მოსახლეობას სამედიცინო მომსახურებას გაუწევს.