საქართველო, 14 თებერვალი, საქინფორმი. საქართველოს პრემიერ-მინისტრმა ირაკლი ღარიბაშვილმა France 24-ისთვის მიცემულ ინტერვიუში (იხ. ვიდეო ქართული სუბტიტრებით), სადაც ევროკავშირთან ასოცირების ხელშეკრულების პარაფირებასა და სოჭის ოლიმპიადაში ქართველი სპორტსმენების მონაწილეობაზე ილაპარაკა, აქცენტი გააკეთა რუსულ-ქართულ ურთიერთობაზე და განაცხადა, რომ ევროინტეგრაციის პროცესში რუსეთს, უკრაინისაგან განსხვავებით, საქართველოზე ხელისშემშლელი ზემოქმედების ნაკლები ბერკეტები გააჩნია. კერძოდ, მან განაცხადა:

„უკრაინა სულ სხვა ისტორიაა, ასევე სომხეთიც. საქართველოში რუსეთს არ აქვს ბევრი ბერკეტი რათა მოახდინოს ზეწოლა საქართველოს გადაწყვეტილებაზე ევროინტეგრაციის საკითხში... 2012 წლის საპარლამენტო არჩევნების შემდეგ ჩვენ რუსეთისადმი დამოკიდებულება შევიცვალეთ. ჩვენ ძალიან კონსტრუქციულები გავხდით... დიახ, დიპლომატიურ მხარეს რაც შეეხება, ჩვენ გავწყვიტეთ კავშირი და 2008 წლის ომის შემდეგ რუსეთთან დიპლომატიური ურთიერთობა აღარ გვაქვს. თუმცა, მიუხედავად ჩვენი კონსტრუქციული ძალისხმევისა, რუსეთის მხრიდან მაინც იგრძნობა ბევრი პროვოკაციული გამოვლინება... საქართველოს ოკუპირებულ ტერიტორიებზე მათ განაგრძეს მავთულხლართების გაბმა. ეს ჩვენი ტერიტორიებია, მათ ეს გააკეთეს 45 კილომეტრზე. ეს გააკეთეს 2013 წელს. მათ თქვეს, რომ ეს დროებითია, მაგრამ არავინ იცის, ეს დროებითია თუ მუდმივი“.