სამართალი
შსს-მ საგარეჯოს რაიონში განზრახ მკვლელობის ფაქტი გახსნა
საქართველო, 6 თებერვალი, საქინფორმი. შსს-ს კახეთის სამხარეო მთავარი სამმართველოს თანამშრომლებმა 1988 წელს დაბადებული, წარსულში ორჯერ ნასამართლევი ზურაბ ტ. - განზრახ მკვლელობის, ხოლო 1967 წელს დაბადებული, ასევე წარსულში ნასამართლევი ანდრია შ. დანაშაულის შეუტყობინებლობის ბრალდებით დააკავეს.
ზურაბ ტ. 2014 წლის 2 თებერვალს, ღამით, საგარეჯოს რაიონის სოფელ ნინოწმინდაში, ანდრია შ-ს საცხოვრებელ სახლში, 1971 წელს დაბადებულ თეონა ც-ს ურთიერთშელაპარაკებისას სხეულის დაზიანებები მიაყენა და შემთხვევის ადგილიდან მიიმალა. თეონა ც. მიყენებული დაზიანებებისგან რამდენიმე საათში გარდაიცვალა. დანაშაულს შეესწრო ანდრია შ, რომელმაც მომხდარის შესახებ პოლიციას არ შეატყობინა.
სამართალდამცველებმა ჩატარებული ოპერატიულ-სამძებრო და საგამოძიებო ღონისძიებების შედეგად ზურაბ ტ. სოფელ სარფში, ხოლო ანდრია შ. თელავში დააკავეს.
ზურაბ ტ. აღიარებს ჩადენილ დანაშაულს. გამოძიება ზურაბ ტ-ს მიმართ განზრახ მკვლელობის, ხოლო ანდრია შ-ს მიმართ დანაშაულის შეუტყობინებლობის ფაქტზე მიმდინარეობს.
