საქართველო, 21 იანვარი, საქინფორმი. რუსეთი მზადაა შუამავლის როლი შეასრულოს უკრაინაში პოლიტიკური კრიზისის დარეგულირებაში, ოღონდ იმ შემთხვევაში, თუ კიევი თავად გვთხოვს ამას, - განაცხადა რფ-ის საგარეო საქმეთა მინისტრმა სერგეი ლავროვმა.

„გარემოება შეიძლება იყოს მხოლოდ ასეთი: თუკი ამას თავად გვთხოვენ. თუმცა, რამდენადაც მესმის, ასეთი დახმარება მათ აღარ სჭირდებათ. ახლა დამყარებულია პირდაპირი კონტაქტები პრეზიდენტს, მთავრობასა და ოპოზიციას შორის“, - განაცხადა ლავროვმა შემაჯამებელ პრესკონფერენციაზე.

„ჩვენ, უდავოდ, ვგმობთ ყოველგვარ ძალადობას. ვიმედოვნებ, რომ ყველას ესმის პროვოკაციების დაუშვებლობა, რომლებსაც ეკრანებზე ვხედავთ“, - აღნიშნა მან.

მოსკოვში უკიდურესად შეშფოთებული არიან უკრაინაში მიმდინარე მოვლენებით და ყველა მხარეს დიალოგისკენ მოუწოდებენ. საგარეო უწყებაში ეჭვი ეპარებათ, რომ არეულობები კიევში გარე ხელშეწყობის გარეშე მოხდა.