საქართველო, 14 იანვარი, საქინფორმი. უკვე გარდუვალი ჩანს, რომ ზამთრის ოლიმპიადა სოჭში რეკორდულ დანახარჯებთან, კორუფციასთან, ეკოლოგიურ დარღვევებსა და რუსეთში სექსუალური უმცირესობების მდგომარეობასთან იქნება ასოცირებული. ამის მიზეზი 2013 წლის ზაფხულში მიღებული კანონია, რომელიც არასრულწლოვანებს შორის არატრადიციული სექსუალური ურთიერთობების პროპაგანდას კრძალავს.

„კანონს პლუსებიც აქვს, - ამბობს გეი-კლუბ „მაიაკის“ თანამფლობელი ანდრეი ტანიჩევი, - აქამდე ხომ რუსი ჰომოსექსუალების უფლებები საერთოდ არ ყოფილა განხილვის საგანი“. თუმცა, ეს მიზანი კანონს არ ჰქონია, - დარწმუნებულია იგი. „ვფიქრობ, ეს კანონი იმიტომ მიიღეს, რომ რეალური პრობლემებიდან ყურადღება გადაიტანონ. ეს რეიტინგული კანონია. ქვეყანაში მოსახლეობის უმრავლესობას ცუდი დამოკიდებულება აქვს გეებისადმი, ხელისუფლება კი რეიტინგებს ეყრდნობა“.

ერთსქესიან ქორწინებაში მყოფი ანდრეი ტანიჩევის თქმით, კანონი მას აკვირვებს. „რა მიიჩნევა იურიდიული თვალსაზრისით პროპაგანდად და რას უნდა ნიშნავდეს ჩემთვის სიტყვა „არატრადიციული“, თუკი მთელი ცხოვრება ასე ვცხოვრობ?“, - სვამს რიტორიკულ კითხვას „მაიაკის“ თანამფლობელი.

ამასთან, ტანიჩევი აღიარებს, რომ რუსულ მედიაში ყველაფერი არც ისე ცუდად შუქდება. სახელწოდება „გეი-კლუბი“ კი მასაც არ მოსწონს.